Як выглядае месца выбухаў салютаў на 3 ліпеня: фота з дрона
15- 4.07.2019, 13:33
- 44,977
Разбураныя марціры застаюцца на месцы здарэння.
Позна ўвечары 3 ліпеня на ўзбярэжжы Свіслачы ў Менску адбылася трагедыя. Падчас запуску святочнага салюту ў парку Перамогі каля стэлы «Менск – горад-герой», дзе напярэдадні прайшоў парад да «дня незалежнасці», чатыры снарады разарваліся, былі разбураныя салютныя ўстаноўкі, аскепкі паляцелі ў бок людзей, паведамляе «Радыё Свабода».
У выніку здарэння 10 чалавек былі параненыя, адна жанчына загінула на месцы, нягледзячы на спробы медыкаў дапамагчы ёй. Акрамя гэтага, выбітыя шыбы ў будынках у розных частках горада.
На месцы падзей усё яшчэ працуюць следчыя, салютныя ўстаноўкі пакуль не прыбралі.
Распачатая крымінальная справа паводле ч.2 арт.463 КК РБ – «парушэнне правілаў абыходжання з рэчывамі падвышанай небяспекі».
Мінабароны паведаміла, што выбухі адбыліся ў трох з шасці месцах Менска, дзе праходзілі салюты. Вызначана, што выбухнулі вырабы аднаго калібру. Паводле звестак установы, прычынай выбухаў, верагодна, сталі няякасныя зарады.
Вядома, што зарады, якія выкарыстоўвалі падчас салюту 3 ліпеня, зробленыя ў Расеі. Іх пастаўляе кампанія «Піра-Рос». Паводле словаў прадстаўніка кампаніі, яны паставілі ў Менск зарады з партыі 2017 года. Прадстаўнікі кампаніі ўжо знаходзяцца ў Менску.
Прэс-сакратар Мінабароны Беларусі Уладзімір Макараў сказаў «Радыё Свабода», што вайскоўцы падчас выбухаў установак на салюце не пацярпелі.