Як Лукашэнка спрабуе замаўчаць «крывавы салют»
48- 5.07.2019, 15:05
- 104,190
Пры гэтым дыктатар выказаў спачуванні Пуціну праз паводку ў Сібіры.
Другі дзень пасля трагедыі падчас святочнага салюту Лукашэнка па-ранейшаму захоўвае маўчанне аб здарэнні, піша «Салідарнасць».
Што да яго афіцыйнага сайта, ён усё ж выказаў спачуванні. Але не сям'і загінулай ад асколка мянчанкі, а Пуціну і сем'ям загінулых у выніку паводкі ў Іркуцкай вобласці.
За гэты час Лукашэнка паспеў павіншаваць прэзідэнтаў ЗША і Венесуэлы з Днём незалежнасці, а таксама падпісаць указ аб увядзенні юбілейнага медаля «100 гадоў органам дзяржаўнага кантролю Беларусі».
На сайце агенцтва БелТА паводле стану на 13.00 5 ліпеня галоўнай навіной з'яўляецца паведамленне пра «павелічэнні золатавалютных рэзерваў краіны». У рубрыцы «прэзідэнт» усё тыя ж спачуванні расейцам, віншаванні і навіна пра новы медаль.
Такая абыякавасць да трагедыі на святкаванні 3 ліпеня рэзка кантрастуе з паводзінамі Лукашэнкі ў іншых экстранных сітуацыях.
Так, у ноч на 4 ліпеня 2008-га дыктатар асабіста прыехаў да месца выбуху каля стэлы «Мінск-горад-герой», калі там яшчэ надавалі дапамогу пацярпелым.
У красавіку 2011-га праз некалькі гадзін пасля тэракту ў менскім метро ён разам з малодшым сынам спусціўся на станцыю «Кастрычніцкая».
Тады аператыўнае з'яўленне дыктатара на месцы здарэння многія расцэньвалі скептычна. Маўляў, нешта тут не так, раз ужо асцярожны Лукашэнка едзе з кветкамі на месца выбуху праз лічаныя гадзіны.
Пасля НЗ з выбухамі салютаў дыктатар запомніцца зацягнутым маўчаннем і паведамленнямі аб новым браняваным лімузіне, на якім ён прыехаў на парад 3 ліпеня.