17 лiпеня 2019, Серада, 4:31
Мы ў адной лодцы
Рубрыкі

Відэафакт: 70-гадовы беларус на коўзанках уразіў інтэрнэт

7

Відэа коўзання за некалькі дзён набрала больш за 100 тысяч праглядаў.

На гэтым тыдні ў Берасцейскім лядовым палацы быў звычайны сеанс масавага коўзання. Незвычайным яго зрабіў паджылы мужчына, які не проста коўзаўся па коле, а з вялікім натхненнем ды імпэтам... танчыў! Hockey.by пагаварыў з аматарам катання - і ён вельмі файны!

Відэа коўзання за некалькі дзён набрала больш за 100 тысяч праглядаў, падабайкі яму паставілі ўжо амаль дзве тысячы чалавек. А вы бачылі?

Героя відэа клічуць Валерый Мішчук, ён з Кобрына. У канцы ліпеня ў Валерыя Іванавіча юбілей - 70 гадоў. Усё жыццё Мішчук служыў у авіяцыі, цяпер на пенсіі.

Імпэт да коўзання ў Валерыя Іванавіча з'явіўся пасля адкрыцця лядовага палаца ў родным горадзе, хоць упершыню на коўзанкі ён стаў значна раней.

- Як і ўсе хлопцы, хадзіў на возера гуляць у хакей. У 11 гадоў стаяў на браме, была куча малая, мне наступілі коўзанкай на руку. Цэлы год мучыўся, блізка не падыходзіў да лёду.

Я пачаў хадзіць коўзацца, купіў сабе фігурныя канькі, вучыўся. Розныя элементы падглядваў у моладзі. Затым злучыў іх у звязку пад музыку, рытмы - і атрымаўся такі адвольны танец... Мяне коўзанне вельмі падсілкоўвае! Людзі выходзяць з лёду стомленыя, кажуць, што ногі баляць. А я наадварот сябе адчуваю, як падсілкаваны акумулятар, гудзе ўва мне энэргія!

Пра тое, што стаў зоркай інтэрнэту, Валерый Іванавіч не ведаў. Але не здзівіўся.

- Я заўважыў, што за мной увесь час круцілася камера: у які бок я - туды і яна. Але відэа не глядзеў. Напэўна, каментавалі: «Што там рабіць дзеду на лёдзе?»? Моладзі тады было шмат, вядома. У канцы сеансу нават юныя хакеісты пад'ехалі да мяне - я іх так натхніў, што яны вакол таксама спрабавалі капіяваць мае рухі. Думаю, ім спадабалася, што можна не проста ездзіць па коле.

- Бяда ўсіх лядовых палацаў у тым, што моладзь гадоў 15-17 носіцца, думае, што ўпэўнена ўсіх абміне ці праскочыць, але ўсё адно спатыкаецца і шкодзіць іншым. Трэба больш жорстка ставіцца да такіх вось «бегуноў». Вядома, часцей гэта тыя, хто гуляе ў хакей, паказваюць свае здольнасці перад дзяўчатамі. Інструктары не зацікаўленыя іх спыняць. Небяспека на масавай коўзанцы ад такіх «файных хлопцаў» вялікая. Праз іх больш за ўсё траўмаў адбываецца. На мяне такія хлопцы таксама спрабавалі наляцець, але рэакцыя ўжо адпрацаваная. Другая праблема: часам не зусім добры лёд, які застаецца пасля трэніровак хакеістаў. Неспрактыкаваным людзям цяжка ездзіць па чужых дарожках, яны спатыкаюцца.

Але коўзацца, нягледзячы на складанасці, Валерый Іванавіч не кіне.

- Коўзанне - гэта лепшы за ўсялякія гімнастыкі і практыкаванні, бо працуе ўсё цела, а яшчэ і ў рытм музыцы. Гэта ж які настрой, жыццё цудоўнае!