Светлагорскі завод беленай цэлюлозы разрывае кантракт з кітайцамі

Магчыма, праз руйнаванне даху.

Светлагорскі ЦКК правядзе пазачарговы сход акцыянераў 15 жніўня. Першае пытанне на парадку дня - скасаванне кантракта будаўнічага падраду з Кітайскай карпарацыяй інжынірынгу САМС (САМСЕ).

Па каментар паводле скасавання кантракту Office Life звярнуўся да прэс-сакратара канцэрна «Беллеспаперапрам» Ружэны Навіцкай.

«Гэта права прадпрыемства, гэта звычайныя камерцыйныя пытанні. Навошта іх камусьці каментаваць?» - здзівілася прэс-сакратарка.

Са свайго боку рызыкнем выказаць здагадку, што кітайскаму падрадчыку наважылі не дараваць руйнаванне даху за заводзе беленай цэлюлозы. Нагадаем, у траўні Сяргей Румас так каментаваў сітуацыю на Светлагорскім ЦКК:

«Прадпрыемства працуе ў рэжыме доследна-прамысловай эксплуатацыі. На жаль, нам не ўдаецца дамовіцца з кітайскім генпадрадчыкам, каб ён у адпаведнасці са сваімі кантрактнымі абавязацельствамі ўводзіў гэты завод у эксплуатацыю, і мы робім гэта сваімі сіламі».

Прэм'ер-міністр тады прызнаў, што з улікам адсутнасці генпадрадчыка і здараюцца такія непрыемныя інцыдэнты, як выпадак з частковым руйнаваннем даху. З ягоных слоў, гэта «непрыемны, але, на жаль, непазбежны момант, калі аб'ект уводзіцца не зусім у адпаведнасці з інструкцыямі, якія прадугледжваюць увод менавіта генпадрадчыкам».

Нагадаем, завод беленай цэлюлозы працуе ў тэставым рэжыме з канца 2017 года. Праца завода выклікае шмат нараканняў у мясцовых жыхароў, якія выходзяць на пратэст супраць працы шкоднага прадпрыемства.