СК: Пры падрыхтоўцы салюту 3 ліпеня набоі абрэзалі і супрацоўнікі расейскай фірмы, і беларускія вайскоўцы

Набытыя набоі для салюту не пасавалі пад марціры.

Старшыня Следчага камітэта Іван Наскевіч на тэлеканале «Беларусь 1» распавёў падрабязнасці расследавання аб справе аб выбуху падчас салюту на Дзень Незалежнасці, калі адзін чалавек загінуў і яшчэ 10 пацярпелі. Са слоў Наскевіч, набытыя набоі для салюту не пасавалі пад марціры, таму прадстаўнікі расейскай кампаніі-пастаўшчыка, а таксама беларускія вайскоўцы, якія рыхтавалі салют, абрэзалі набоі ды ўкатывалі іх аб цвёрдую паверхню, хоць маніпуляцыі з прафесійным піратэхнічным вырабам у выглядзе разборкі і дапрацоўкі забароненыя. Раней Наскевіч таксама адзначаў, што частка вырабаў была са скончаным тэрмінам прыдатнасці, паведамляе tut.by.

- Дакладна выяўлена, што самі набоі перад тым, як былі апушчаныя ў марціры, мелі механічнае ўздзеяння, якое не прадугледжана тэхнічнай дакументацыяй, - заявіў Іван Наскевіч. - Як прадстаўнікі расейскай фірмы, так і нашы вайскоўцы з іх рэкамендацыі, набоі абрэзвалі, укатывалі іх аб цвёрдую паверхню, каб яны змясціліся. Нам трэба будзе высветліць тэхнічныя прычыны выбуху: гэтыя дзеянні прывялі да выбуху.

Кіраўнік СК таксама адзначыў, што паводле справы прызначаны шэраг экспэртыз, менавіта экспэрты павінны адказаць на пытанне, што стала тэхнічнай прычынай выбуху.

Таксама у межах якога будуць праведзены следчы эксперымент. Следчыя правяраюць і іншыя аспекты, якія папярэднічалі самому салюту - як закуплялі феерверачныя вырабы, чаму Міністэрства абароны працяглы час закупляла вырабы ў аднаго пастаўшчыка і на якіх умовах.

Мінабароны закупіла вырабы ў расейскай кампаніі «Піра-Рос», супрацоўнікі якой заявілі, што падчас салюту ў Менску выкарыстоўваліся феерверкі ўласнай вытворчасці 2017 года выпуску. Кампанія ажыццяўляе пастаўкі прадукцыі для патрэб Мінабароны Беларусі шмат гадоў, сума кантракту - блізу 20 млн расейскіх рублёў (звыш 300 тысяч даляраў).

Абвінавачванне паводле справы выстаўлена двум супрацоўнікам расейскай кампаніі (ч. 2 арт. 299 КК - «Парушэнне правілаў абыходжання з выбуханебяспечнымі рэчывамі, піратэхнічнымі вырабамі, што пацягнула з неасцярожнасці смерць чалавека»), яны знаходзяцца ў СІЗА. Два беларусы, якія мелі дачыненне да запуску салюту, праходзяць падазраванымі паводле справы, раней заяўлялі ў СК.