Лукашэнка: Крадзеж квітнее

Дыктатар абвінаваціў беларускі народ у недысцыплінаванасці.

Лукашэнка падчас рабочай паездкі ў Магілёўскую вобласць абвінаваціў беларусаў у тым, што яны грэбуюць дысцыплінай, арганізаванасцю і выкананнем закона.

Пра гэта ён заявіў падчас размовы з жыхарамі Касцюковічаў, паведамляе ягоная прэс-служба.

«Расхлябанасць насельніцтва надзвычайная. Не хачу сказаць, што ўсе дрэнныя. Але крадзеж квітнее. Мне нават сорамна як прэзідэнту пра гэта гаварыць. Прытым крадуць усё - ад дызельнага паліва і бензіну і г.д. Нядаўна выявілі: проста з поля збожжа вязуць дадому. Знахабіліся да такой ступені, што нават не хаваюцца. Бяруць, як усё сваё. Вось гэта мы выкарчуем з коранем», - запэўніў ён.

«Калі вы хочаце, каб было лепш тут, а тут павінна быць лепш (у вас цудоўнае месца для жыцця)... Выдатныя працавітыя людзі! Трэба даць ім магчымасць працаваць і зарабляць. А тых, хто перашкаджае, тых мы ў пачуццё прывядзём», - падсумаваў Лукашэнка.