У Беларусі малако падаражэла з пачатку года аж на 28%

Пакапаўшыся ў старых чэках, журналісты наважылі параўнаць кошты на некаторыя тавары.

Праз тое што раздробныя цэны на сацыяльна значныя прадукты ў Беларусі з пачатку года выраслі, Міністэрства антыманапольнага рэгулявання і гандлю цісне на «трывожную кнопку», піша kp.by.

У канцы мінулага тыдня ў ведамстве заявілі, што не выключаюць вяртання да прамога рэгулявання коштаў на тавары са спісу, і заклікалі раздробны гандаль прытрымлівацца рэкамендаваных гандлёвых надбавак: ад 15 да 30%. Прычына - рызыка невыканання гадавога плана інфляцыі.

Днямі міністр Уладзімір Калтовіч правёў нараду, падчас якой заявіў, што да сярэдзіны верасня МАРГ правядзе маніторынг цэнаўтварэння. І затым наважаць, ці пераходзіць ад рэкамендацый да прамых абмежаванняў.

Міністр заўважыў, што цэны на сацыяльна значныя тавары растуць хутчэй, чым на ўсё астатняе за кошт раздробнага гандлю. Часам гандлёвая надбаўка магла перавышаць 60%.

- Калі казаць проста: гандаль павялічыла свае апетыты, - паведамляе словы міністра БелТА.

Калі сітуацыя не зменіцца, прыстрашыў Калтовіч, ведамства разгледзіць увядзенне цэнавага рэгулявання для вытворцаў, перапрацоўшчыкаў і гандлю.

Прамога цэнавага рэгулявання ў нас няма ўжо больш за тры гады. Шлях да гэтага быў доўгім. Яго пікавая фаза - увядзенне мараторыя на рост цэн у снежні 2014 на фоне дэвальвацыі. Яго адмянялі паступова за чатыры месяцы. Са студзеня 2016 года скасаванае і ўсталяванне гранічных цэн і надбавак на сацыяльна значныя прадукты.

Сыход ад адміністрацыйнага цэнаўтварэння станоўча ўспрынялі ўдзельнікі рынку і міжнародныя арганізацыі. Ёсць і дамоўныя абавязанні: краіна - сябар Еўразійскага саюза можа ўводзіць цэнавае рэгуляванне на пэўную групу тавараў не больш чым на 90 дзён у годзе.

У пераліку сацыяльна значных тавараў цяпер - паўтара дзясятка пазіцый: мяса і некаторая рыба, пшанічная мука, масла сметанковае і алей сланечнікавы і рапсавы, соль і цукар, аўсяныя шматкі, белы рыс і грэчка, макароны (з няцвёрдых гатункаў пшаніцы), хлеб, яйкі, дзіцячае харчаванне, малако і кефір, смятана, тварог.

Пакапаўшыся ў старых чэках, журналісты вырашылі параўнаць цэны на некаторыя тавары.

Малако аднаго і таго ж вытворцы тлустасцю 2,5%, 900 мл, у канцы снежня ў гандлёвай сетцы каштавала 1,17 рубля, цяпер - 1,5 рубля (рост на 28%!). Смятана 26%, 200 г – рост больш сціплы: з 1,34 да 1,4 рубля (на 4,5%). Пачак макаронаў (500 г.) падаражэў з 1,89 да 1,99 рубля (на 5,3%).

Вядома, аналіз прыблізны, але пэўнае ўяўленне пра рэальныя адчуванні інфляцыі пакупнікам дае.