У Архангельску зафіксавалі павышаны ўзровень бэта-выпраменьвання
3- 18.08.2019, 11:43
- 11,467
Што яшчэ хаваюць расейскія ўлады пасля ядзернага выбуху на сакрэтным палігоне?
14 жніўня на сайце Greenpeace была апублікаваная навіна аб тым, што «дзяржаўныя органы распаўсюджваюць у СМІ няпоўную інфармацыю аб радыеактыўным забруджванні ў Архангельскай вобласці», паведамляе выданне «Северные новости».
У паведамленні гаворыцца, што да насельніцтва не была данесеная інфармацыя, што «Расгідрамет зафіксаваў павышаны ўзровень не толькі гама-, але і бэта-выпраменьвання, прычым не толькі ў Северадвінску (8 жніўня), але і ў Архангельску ў выглядзе ападкаў (узровень вырас 9 жніўня, значэнні заставаліся падвышанымі 10 і 11 жніўня).
Акрамя таго, расейскае аддзяленне Greenpeace адзначае, што дагэтуль не апублікаваная інфармацыя, якія менавіта радыеактыўныя рэчывы патрапілі ў навакольнае асяроддзе ў выніку выбуху 8 жніўня на вайсковым палігоне ў Нёнаксе.
І падкрэслівае, што дагэтуль не атрыманыя адказы на афіцыйныя звароты, адпраўленыя ў Расспажыўнагляд і Расгідрамет у дзень трагедыі. Зафіксаваныя значэнні не высокія, але гэта значэнні за дзясяткі кіламэтраў ад месца выбуху, акрамя таго важна разумець, якія менавіта радыенукліды патрапілі ў навакольнае асяроддзе.
Ад гэтага залежыць назапашванне ў навакольным асяроддзі і ўплыў на прыроду ды чалавека. Бліжэй да месца трагедыі ўзровень радыеактыўнага забруджвання можа быць вышэйшы, і там таксама жывуць людзі.
Таксама важна высветліць, ці адбылося забруджванне акваторыі. Хаваць інфармацыю аб радыеактыўным забруджванні ад людзей папросту неймаверна, - каментуе сітуацыю экспэрт расейскай філіі Greenpeace Рашыд Алімаў.