Фотафакт: Бясконцыя тысячы людзей выйшлі на марш пратэсту ў Ганконгу
2- 18.08.2019, 14:04
- 9,767
Арганізатары чакаюць, што ў акцыі возьмуць удзел блізу 300 тысяч чалавек.
Пратэстоўцы ў Ганконгу, якія ў нядзелю ўдзень сабраліся ў парку Вікторыя на чарговую масавую акцыю, накіраваліся маршам у дзелавы цэнтр горада. Арганізатары чакаюць, што агулам у акцыі пратэсту возьмуць удзел блізу 300 тысяч чалавек, паведамляе ВВС.
Дэманстранты пачалі збірацца ў парку Вікторыя а 15:00 паводле мясцовага часу (07:00 па Грынвічы, 10:00 з Менску), нягледзячы на дождж.
Паліцыя не дала згоды на марш праз боязь з нагоды бяспекі і дазволіла пратэстоўцам заставацца ў парку да вечара. Аднак праз дзве гадзіны пасля пачатку акцыі дэманстранты парушылі забарону: тысячы чалавек пад парасонамі рушылі вуліцамі горада.
Пакуль марш праходзіць мірна, паліцыя не ўмешваецца.
Раней прадстаўніца Грамадзянскага фронту за правы чалавека Боні Лан у размове з журналістамі назвала адмову ў правядзенні маршу непатрэбным абмежаваннем, і выказала сумнеў, што парк Вікторыя зможа змясціць усіх ахвотных узяць удзел у акцыі.
«Парк Вікторыя проста не ў стане змясціць усіх, бо гэты раён можа змясціць толькі 100 тысяч чалавек, а мы чакаем значна больш удзельнікаў», - сказала яна.
Субота ў Ганконгу прайшла на здзіўленне спакойна - сур'ёзных сутычак не было, і некаторыя дэманстранты сцвярджалі, што берагуць сілы для акцыі ў нядзелю. Яе арганізатары паабяцалі, што нядзельная акцыя будзе мірнай, а за інцыдэнты адказнасць будзе несці паліцыя.
«Я хацеў бы, каб выйшла яшчэ болей людзей. Мы неаднаразова спрабавалі мірна пазначыць нашу пазіцыю. Спадзяюся, урад пачне да нас прыслухоўвацца», - цытуе Франс прэс 30-гадовага ўдзельніка акцыі Рэя Чонга.
Тон заяваў у Пекіне што да пратэстаў, якія не спыняліся ўжо некалькі месяцаў, становіцца ўсё больш рэзкім. Кітайскія ўлады заявілі, што паводзіны дэманстрантаў падобныя на тэрарыстычную актыўнасць.
гісторыя пратэсту
Дэманстрацыі ў Ганконгу пачаліся ў чэрвені пасля ўнясення закона аб спрошчанай працэдуры экстрадыцыі падазраваных у іншыя краіны, уключаючы мацерыковы Кітай.
У 1997 годзе Ганконг (былая брытанская калонія) быў перададзены пад кіраванне Пекіна паводле дамовы, у адпаведнасці з якой камуністычны ўрад КНР абяцаў не змяняць палітычны і эканамічны лад на востраве і падтрымліваць прынцып «адна краіна - дзве сістэмы».
Спрошчаная працэдура высылкі падазраваных у Кітай пагражае пераследам іншадумцаў у Ганконгу, мяркуюць праціўнікі закона.
Пад ціскам пратэстоўцаў ганконгская адміністрацыя на няпэўны час зняла законапраект з разгляду, але апазіцыя мяркуе, што гэтага недастаткова і патрабуе адклікаць яго канчаткова.
Акрамя таго, пратэстанты патрабуюць адстаўкі кіраўніка адміністрацыі Ганконга і спынення крымінальных спраў, распачатых супраць некалькіх дзясяткаў чалавек.
У пачатку жніўня блізу 40 затрыманых паўсталі перад судом паводле абвінавачвання ў парушэнні грамадскага парадку і правакацыях. Ім пагражае да 10 гадоў турмы.