Дырэктары і буйныя бізнэсоўцы: хто стаў фігурантам новай «справы медыкаў»

Сёння ў Менскім гарадскім судзе пачынаецца працэс, дзе ў спісе абвінавачаных 21 чалавек.

Сярод фігурантаў - брат вядомага бізнэсоўцы Сяргей Шакуцін і дырэктар Цэнтра экспэртыз і выпрабаванняў аховы здароўя Аляксандр Сталяроў, паведамляе tut.by.

Судовыя працэсы паводле «справы медыкаў» ідуць ужо восьмы месяц. Але ўпершыню супрацоўнікі сістэмы аховы здароўя і бізнэсоўцы апынуцца на адной лаве. Звычайна за кратамі былі лекары, а прадстаўнікі камерцыйных арганізацый станавіліся ключавымі сведкамі ў крымінальнай справе, некаторыя з іх, як высветлілася ў судзе, спачатку былі затрыманыя, пасаджаныя ў СІЗА КДБ, але затым вызваляліся ад крымінальнай адказнасці ў сувязі з супрацоўніцтвам са следствам.

У гэтай справе інакш. Хабарадавальнікі таксама на лаве падсудных. Частка фігурантаў гучнага працэсу абвінавачваецца паводле арт. 430 КК (Атрыманне хабару), іншая - па арт. 431 (Дача хабару). Некаторыя з іх знаходзяцца не пад вартай.

Хто стаў фігурантам новай «справы медыкаў»?

Аляксандр Сталяроў - дырэктар Цэнтра экспэртыз і выпрабаванняў аховы здароўя. Яму выстаўленае абвінавачванне паводле ч.ч. 1,2, 3 арт. 430 КК (Атрыманне хабару ў асабліва вялікай суме), санкцыя артыкула - да 15 гадоў пазбаўлення волі.

Інфармацыя пра затрыманне Сталярова з'явілася 25 чэрвеня 2018 года, КДБ паведаміў, што кайданкі на дырэктара надзетыя за развязанне пытанняў дзяржаўнай рэгістрацыі лекаў. Тады ж паведамлялася: за кратамі таксама апынуўся дырэктар прадпрыемства «Белмедтэхніка» Аляксандр Шарак за арганізацыю ўкладанне і выкананне дамоў, забеспячэнне своечасовай аплаты і рэалізацыю закупак. У яго гаражы знайшлі 620 тысяч даляраў гатоўкай. Праўда Шарак не фігуруе ў гэтай справе, не было інфармацыі і пра тое, што ён паўстаў перад судом.

Сяргей Зінчанка - намеснік дырэктара Цэнтра экспэртыз і выпрабаванняў аховы здароўя. Абвінавачваецца паводле ч.ч. 1,2 арт. 430 КК (Атрыманне хабару ў вялікай суме), санкцыя артыкула - да 10 гадоў пазбаўлення волі.

Уладзімір Ладуцька - заснавальнік «Геол-М», асноўны хабарадавальнік, які фігураваў у многіх працэсах паводле «справы медыкаў». Ён праходзіў у якасці сведкі, калі судзілі былога галоўнага лекара Рэспубліканскага цэнтра медыцынскай рэабілітацыі і бальнеалячэння Сяргея Карыцькі, экс-супрацоўніка «Белмедтэхніка» Сяргея Шунькіна, былога кіраўніка Гарадзенскай абласной здраўніцы Андрэя Стрыжака, галоўнага лекара 12-й гарадской клінічнай стаматалагічнай паліклінікі Уладзімір Краўчанкі, былога галоўнага лекара 1-й гарадской клінічнай лякарні Алега Фаміна.

Падчас судовага працэсу паводле справы Сяргей Карыцькі бізнэсовец распавядаў, што грошы перадаваў у якасці падзякі, ніякай дамоўленасці загадзя не было.

- Усе дарослыя людзі, - казаў Уладзімір Ладуцька. - Разумеюць.

Сумы былі розныя. Напрыклад, Карыцька заснавальнік «Геол-М» перадаў дзве тысячы даляраў, Андрэй Стрыжак - блізу 20 тысяч даляраў, Уладзімір Краўчанка - 10 тысяч даляраў.

Цяпер бізнэсоўцу Уладзіміру Ладуцьку паводле ч.1 арт. 431 (Дача хабару), пагражае ад штрафу да пяці гадоў пазбаўлення волі.

Інга Шалькевіч - ужо выступала ў якасці сведкі ў справе навукоўца, акадэміка, вядомага лекара Аляксандра Бялецкага. Яна працавала маркетолагам у фармацэўтычнай кампаніі, незадоўга да звальнення ейны шэф папрасіў перадаць пакет для Бялецкага, усярэдзіне было 3 тысячы даляраў. Падчас допыту ў судзе Шалькевіч настойвала: пра грошы нічога не ведала, для сябе пастанавіла, што проста перадае «нейкую інфармацыю».

- Хачу сказаць, што Аляксандр Валянцінавіч - адзіны чалавек, якому я магу даверыць сваё жыццё. У тое, пра што вы сёння кажаце, ніяк не магу паверыць. За час нашага знаёмства не было ніводнага намёку на грошы, - распавядала Інга Шалькевіч.

Аляксандр Бялецкі прысуджаны да 7,5 гадоў пазбаўлення волі. Інзе Шалькевіч выстаўленае абвінавачанне паводле ч.2 арт. 431 КК (Дача хабару паўторна або ў вялікай суме), санкцыя прадугледжвае да сямі гадоў пазбаўлення волі.

Сяргей Лешчылоўскі - начальнік управы медыцынскай тэхнікі Цэнтра экспэртыз і выпрабаванняў аховы здароўя. Яму выстаўленае абвінавачванне паводле ч.ч. 1,2 арт. 430 КК (Атрыманне хабару ў вялікай суме), санкцыя артыкула - да 10 гадоў пазбаўлення волі.

Д. Кузняцоў, А. Патаповіч - абвінавачваюцца паводле ч.2 арт. 431 КК (Дача хабару паўторна або ў вялікай суме), пагражае да сямі гадоў пазбаўлення волі.

Сяргей Шакуцін - бізнэсовец, дырэктар кампаніі «Іскамед», малодшы брат старшыні рады дырэктараў «Амкадору» Аляксандра Шакуціна.

Кампанія «Іскамед» была створаная ў траўні 1995 года. Сёння гэта адно з найбуйнейшых прыватных прадпрыемстваў на фармацэўтычным рынку Беларусі. Сетка аптэк «Іскамед» складаецца з 84 гандлёвых пунктаў у розных рэгіёнах краіны, гаворыцца на сайце кампаніі.

У прадпрыемства былі ўкладзеныя дырэктыўныя дамовы з вядучымі беларускімі вытворцамі, заводамі краін блізкага і далёкага замежжа. У прадпрыемства былі ўкладзеныя дырэктыўныя дамовы з вядучымі беларускімі вытворцамі, заводамі краін блізкага і далёкага замежжа. Кліенты прадпрыемствы - дзяржаўныя фармацэўтычныя прадпрыемствы, лячэбна-прафілактычныя ўстановы, найбуйнейшыя прыватныя аптэчныя сеткі і вялікая колькасць самастойных аптэк, гаворыцца ў прэзентацыі кампаніі. Колькасць персаналу «Іскамеда» складае звыш 400 супрацоўнікаў.

Сяргей Шакуцін быў затрыманы летам 2018 года. Яму выстаўленае абвінавачанне паводле ч.2 арт. 431 КК (Дача хабару паўторна або ў вялікай суме), пагражае да сямі гадоў пазбаўлення волі

Леанід Томчын - старшыня рады дырэктараў найбуйнейшай прыватнай аптэчнай сеткі «Аптэка груп». Леанід Томчын займае 33-ю пазіцыю ў топ-200 самых уплывовых беларускіх бізнэсоўцаў паводле версіі «Ежедневника». Цяпер у складзе холдынгу «Аптэка ГУПП» 260 аптэк, пад брэндамі ADEL і «Добрыя лекi» працуе 201 гандлёвы аб'ект. Блізу 60 аптэк знаходзіцца пад кіраўніцтвам «Аптэка груп».

Інфармацыя пра затрыманне Томчына з'явілася ў жніўні 2018 года, пазней ён выйшаў на волю і ўжо ў верасні даў інтэрв'ю «Office Life».

- Кажучы пра перспектывы, нельга не ўспомніць аб паведамленнях у прэсе і пра чуткі аб вашым арышце.

- Цяпер я перад вамі. Думаю, гэта і ёсць адказ на гэтае пытанне.

Леаніду Томчыну выстаўленае абвінавачанне паводле ч.2 арт. 431 КК (Дача хабару паўторна або ў вялікай суме), санкцыя артыкула прадугледжвае да сямі гадоў пазбаўлення волі.

Раман Альтшулер - выканаўчы дырэктар холдынгу «Аптэка груп». Рамана Уладзіміравіча, як і Леаніда Томчына, абвінавачваюць паводле ч.2 арт. 431 КК (Дача хабару паўторна або ў вялікай суме), санкцыя артыкула прадугледжвае да сямі гадоў пазбаўлення волі.