Шэсць выпадкаў, калі беларусы перамагалі судовую сістэму

У нашай краіне такое вельмі рэдка, але сустракаецца.

Статыстыка сведчыць, што калі ў Беларусі крымінальная справа дайшла да суда, то на апраўдальны прысуд можна практычна не спадзявацца. Напрыклад, у мінулым годзе іх колькасць у судах склала меней за 0,2%.

І ўсё ж час ад часу здараюцца выключэнні. Udf.by распавядае аб шасці апраўдальных прысудах у гучных справах, якія былі вынесеныя ў Беларусі за апошнія паўтара года.

Справа маці, якая адважылася на хатнія роды

Паўтара годв таму Віцебскі абласны суд апраўдаў Вольгу Сцяпанаву, у якой падчас хатніх родаў загінула дзіця. Жанчыне давялося нямала вытрываць, бо раней яе прызналі вінаватай у прычыненні смерці з неасцярожнасці і прысудзілі да шасці месяцаў калоніі ў паселішчы. А ў СІЗА яна да гэтага правяла чатыры месяцы.

Вольга Сцяпанава была абураная дзеяннямі кіраўніка Следчага камітэта Івана Наскевіча, які напярэдадні першага суда заявіў: «Спадзяюся, што суд прыме бок следчых».

Пасля апраўдальнага вердыкту Вольга Сцяпанава з'ехала дадому ў Санкт-Пецярбург, забраўшы туды і сваю маці з Віцебска. Вяртацца ў Беларусь яна больш не плануе.

Справа лекара, які няўдала пракалоў вену пацыенту

Год таму суд апраўдаў 36-гадовага анестэзіёлага-рэаніматолага, якога абвінавачвалі ў неналежным выкананні прафесійных абавязкаў, што пацягнула з неасцярожнасці смерць пацыента.

Пасля таго, як лекар Гарадской бальніцы пракалоў вену, пацыент страціў шмат крыві, што прывяло да спынення сэрца і смерці. Але пры гэтым загінулы ўжо знаходзіўся ў коме - у лякарню ён паступіў з цяжкімі ўскладненнямі атручвання. Суд пагадзіўся, што лекар выконваў вельмі складаную аперацыю.

Цікава, што праз паўгода была заведзеная крымінальная справа на 23-гадовую лекарку-інтэрна з лякарні Бабруйска. Але да суда яна не дайшла - справу закрылі.

Справа работніка, якога абвінавачвалі ў забойстве дырэктара

У пачатку гэтага года суд вынес апраўдальны прысуд паводле крымінальнай справы пра забойства ў 2010 годзе дырэктара ТАА «Глобал Аўта Сіці».

Па сутнасці абвінавачваўся толькі адзін чалавек - былы работнік прадпрыемства Максім Дышлевіч, бо другі падазраваны да суда не дажыў (загінуў у ДТЗ). Пасля забойства злачынец (ы) спрабавалі вынесці з офіса сейф, але выцягнуць яго не хапіла сіл.

Дышлевіч распавёў, што яго прымусілі агаварыць іншага абвінавачанага і наўзамен адпусцілі з СІЗА.

Бо пры вобшуку дома ў Дышлевіча не знайшлі ніводнага прадмета, які сведчыў бы пра дачыненне да ўчыненага забойства, і да таго ж у хлопца было алібі (следства яго не зняпраўдзіла) быў вынесены апраўдальны прысуд.

Справа дырэктара РЦАП у паралімпійскіх тыпах спорту

Вясной гэтага года суд апраўдаў дырэктарку РЦАП у паралімпійскіх тыпах спорту Іну Рамановіч, якую абвінавачвалі ў буйным хабары.

Следчы камітэт паведамляў, што галоўны трэнер нацыянальнай каманды ў інваспорце РЦАП перадала ёй 15 тысяч даляраў за ўкладанне новага працоўнага кантракта. Нібыта дырэктарка дала зразумець, што толькі ў выпадку хабару трэнер зможа захаваць за сабой ранейшую пасаду. Суд палічыў абвінавачванні недаказанымі.

Справа майстра «Гродна Азот», якога абвінавачвалі ў смяротным выбуху

Летам суд апраўдаў майстра ў рамонце тэхналагічнага абсталявання Мікалая Савуля, якога абвінавачвалі ў парушэнні правілаў пажарнай бяспекі, што пацягнула па неасцярожнасці смерць чалавека.

Суд доўжыўся блізу двух гадоў. Пры правядзенні агнявых работ іскры трапілі на гідраксіламінсульфат, пасля чаго ад атручвання загінулі двое рабочых. Абвінавачаны намагаў: яго не папярэдзілі, што побач захоўваецца небяспечны хімікат, да таго ж іскра ад разака не магла выклікаць выбух. Пасля вывучэння меркавання экспэртаў суд прыслухаўся да яго довадаў.

Справа галоўнага інжынера МЗКЦ

Мабыць, самае гучная справа апошняга часу, якая скончылася апраўдальным прысудам. Месяц таму Андрэя Галавача ў чарговы раз прызналі невінаватым, і ён змог, нарэшце, выйсці на волю.

У СІЗА Галавач правёў больш за 50 месяцаў. Следства да апошняга сцвярджала, што галоўны інжынер Менскага завода колавых цягачоў неаднаразова браў хабары, але так і не змагло падаць пераканаўчых довадаў.