СМІ: СБУ распачала крымінальную справу ў дачыненні да «112 Украіна»

Кантроль над каналам Мядзведчука можа атрымаць кіраўнік Офіса прэзідэнта Украіны.

Служба бяспекі Украіны адкрыла крымінальную справу ў дачыненні да тэлеканала "112 Украіна". Са звестак крыніц выдання "theБабель", зрабілі гэта на заяву яго былога ўладальніка Андрэя Падшчыпкава, які надоечы вярнуўся ў Беларусь.

Падшчыпкаў у свой час з'ехаў з Украіны, заявіўшы пра ціск з боку ўладаў. Пакуль ён быў за мяжой, у красавіку 2018 года канал спачатку прадалі Эдуарду Кацу, якога звязваюць з палітыкам Віктарам Мядзведчуком. У снежні таго ж года Кац прадаў "112 Украіна" паплечніку Мядзведчука, народнаму дэпутату Тарасу Казаку.

У ліпені 2019 года Падшчыпкаў звярнуўся да новаабранага прэзідэнта Уладзіміру Зяленскага. У сваім звароце ў YouTube ён назваў сябе адзіным законным уласнікам канала, заявіў аб яго "рэйдарскім захопе" і заклікаў прыцягнуць да крымінальнай адказнасці Каца, Казака і нардэпа-уцекача Аляксандра Анішчанку, які нібыта вёў перамовы аб куплі канала ад імя экс-прэзідэнта Пятра Парашэнкі.

Са слоў дзвюх крыніц выдання ў праваахоўных органах, у жніўні гэтага года СБУ на падставе заявы Падшчыпкава распачала крымінальную вытворчасць у дачыненні "112 Украіна" паводле артыкула аб супрацьдзеянні законнай гаспадарчай дзейнасці. У рамках следства СБУ просіць Генпракуратуру распачаць хадайніцтва аб арышце маёмасці канала, аднак генпракурор Юрый Луцэнка, са слоў крыніцы ў ягоным атачэнні, адмовіўся гэта рабіць.

Больш за тое, Генпракуратура хоча перадаць крымінальную справу ў Міністэрства ўнутраных спраў, бо гэты артыкул не мае дачынення да СБУ.

У адказ на запыт выдання часовы выканаўца абавязкаў кіраўніка СБУ Іван Баканаў не пацвердзіў і не зняпраўдзіў гэтую інфармацыю, матывуючы таямніцай следства. Луцэнка, у сваю чаргу, заявіў: "Мая пазіцыя - арыштоўваць СМІ можна толькі паводле справы аб дзяржаўнай здрадзе або пагрозе тэрытарыяльнай цэласнасці. Усё астатняе - непрымальна для дэмакратыі".

Дзве крыніцы выдання ў праваахоўных органах і ў асяроддзі былога кіраўніцтва канала сцвярджаюць, што і за відэазваротам Падшчыпкава, і за новай крымінальнай справай у дачыненні да "112 Украіна" стаіць кіраўнік Офіса прэзідэнта Андрэй Богдан. Ён нібыта хоча атрымаць кантроль над рэйтынгавым тэлеканалам і вывесці яго са сферы ўплыву Мядзведчука.

На запыт выдання Богдан не адказаў.

Калі будучы генпракурор накладзе арышт на маёмасць канала "112 Украіна", Агенцтва вышуку і менеджменту актываў (АРМА) зможа перадаць гэтую маёмасць ва ўправу кампаніі, якая пераможа ў адпаведным конкурсе. Цяпер такі конкурс не абвешчаны, назвы кампаній-прэтэндэнтаў таксама невядомыя.