У Італіі партыя Сальвіні можа выявіцца ў апазіцыі

Дзве партыі могуць сфармаваць урад без «Лігі».

Прэзідэнт Італіі Сэрджыа Матарэла ў сераду праводзіць кансультацыі з лідарамі палітычных партый аб фармаванні новага ўрада. Кіраўнік кабінета міністраў Джузэпэ Контэ напярэдадні сышоў у адстаўку праз раскол у кааліцыі дзвюх папулісцкіх сілаў - партыі «Ліга» Матэа Сальвіні і «Руху пяці зорак», паведамляе «Радыё Свабода».

Падчас выступу ў Сенаце парламента Контэ раскрытыкаваў віцэ-прэм'ера і лідара «Лігі» Матэа Сальвіні за тое, што ён, як мяркуе Контэ, справакаваў урадавы крызіс і паставіў інтарэсы сваёй партыі вышэй за інтарэсы дзяржавы.

Сальвіні фактычна стаў ініцыятарам расколу, заяўляючы апошнім часам аб неабходнасці датэрміновых выбараў і пра рознагалоссі ў кабінеце міністраў. Фармальным момантам пачатку ўрадавага крызісу стала нядаўняе галасаванне «Лігі» разам з апазіцыяй за будаўніцтва высакахуткаснай чыгункі ў Францыю - насуперак пазіцыі «Руху пяці зорак».

Прэзідэнт сустрэнецца з лідарамі апазіцыйнай Дэмакратычнай партыі і «Руху пяці зорак». Шэраг каментатараў, а таксама прадстаўнікі абедзвюх палітычных сілаў не выключаюць, што гэтыя дзве сілы, нягледзячы на рознагалоссі, змогуць сфармаваць новую кааліцыю - што дазволіць пазбегнуць датэрміновых выбараў.

Паводле звестак італійскіх СМІ, сам Сальвіні ўважае такую магчымасць больш чым рэальнай. У гэтым выпадку ягоная правапапулісцкая «Ліга» апынецца ў апазіцыі, а кабінет міністраў стане больш цэнтрысцкім і больш праеўрапейскі арыентаваным. Зрэшты, па-ранейшаму незразумела, ці ўдасца сфармаваць новую кааліцыю і хто прэтэндуе на ролю прэм'ера ў новым магчымым кабінеце.