Як выглядае «кантроль Лукашэнкі»: наглядны прыклад

Фотафакт з серыі «было/стала».

Больш за год таму ў дзяржаўных СМІ анансавалі пачатак спецпраекту «На кантролі Лукашэнкі», піша Зміцер Дрозд для «Салiдарнасцi».

Першы сюжэт быў прысвечаны стану мясцовых дарог. Галоўным героем першага сюжэту была дарога, якая злучае трасу Капыль-Слуцк з вёскай Яўсеевічы.

«... Больш за гадзіну вымушаныя ісці пешшу жыхары вёскі Яўсеевічы да найбліжэйшага прыпынку, адкуль можна было б дабрацца да цывілізацыі. Праз дрэнныя дарогі вяскоўцы адрэзаныя ад нармальнага жыцця, а гэта значыць, што аптэкі, паліклінікі, крамы, пошта - па-за зонай доступу», - пісала sb.by.

Колькі слоў было сказана абуранымі жыхарамі Яўсеевіч і найбліжэйшых вёсак, бо пра іх, нарэшце, успомнілі. Прычым, іх жыццём зацікавіліся не толькі дзяржаўныя медыя, але і сам Лукашэнка.

Аляксандр Лукашэнка, наведваючы яшчэ ў кастрычніку 2017 года Слуцкі раён, паставіў задачу: «Нам трэба мясцовую сетку дарог падняць да ўзроўню рэспубліканскіх дарог. Я маю на ўвазе не ў шырыню і вышыню, а каб людзі маглі па якасных дарогах перамяшчацца».

І справа зрушылася з мёртвага пункту! На шматпакутную дарогу прыехала будаўнічая тэхніка. Хутка і месцамі якасна знялі пласт старога асфальту.

«Вось-вось будзе дарога!» - радасна казалі мясцовыя жыхары: «Прэзідэнт сказаў, прэзідэнт зрабіў!»

Прайшоў час. Дарога так і засталася ў тым жа стане. З ямамі, дзюрамі і расколінамі. Толькі ўжо без асфальту.