Гендырэктар «Тамбаз» распавёў, як ратаваў кампанію ад дэфолту

У Менску працягваецца гучны працэс над забудоўшчыкам.

Сёння ў судзе Заводскага раёна працягваецца разгляд крымінальнай справы ў дачыненні да былога генеральнага дырэктара «Тамбаз» Льва Хаюціна, які абвінавачваецца ў службовай халатнасці і злоўжыванні ўладай (або службовымі паўнамоцтвамі). Структура Хаюціна, нагадаем, будавала шматпакутны ЖК «Аркадыя» ў Менску. Падчас папярэдняга следства пацярпелымі былі прызнаныя 606 чалавек і 9 суб'ектаў гаспадарання. Леў Хаюцін пагадзіўся даць паказанні, паведамляе tut.by.

Сёння Леў Хаюцін заявіў хадайніцтва пра тое, каб судовыя пасяджэнні ў справе былі хаця б праз дзень. Леў Язэпавіч спаслаўся на ўзрост і наяўнасць хранічных захворванняў, якія не даюць яму магчымасці паўнавартасна аднавіцца пасля судовага працэсу. Хадайніцтва будзе разгледжанае.

Учора Хаюцін даваў паказанні пра тое, што з сябе ўяўляе жылы комплекс «Аркадыя», як асвойвалася пляцоўка пад яго будаўніцтва і як яна потым фінансавалася.

Сёння ён больш дэталёва тлумачыць фінансавы бок пытання. Між іншым, як крэдытаваўся аб'ект будаўніцтва, праз які прамежак часу трэба было вяртаць крэдыт, а таксама якой была схема рэалізацыі незапатрабаванай нерухомай маёмасці - напрыклад, машына-месцаў, якія жыхарам комплексу былі не патрэбныя. У мінулым судовым пасяджэнні Хаюцін казаў пра тое, што з 640 чалавек толькі адзін купіў два машына-месцы.

Нагадаем, у комплексе будаваліся не толькі дамы, але і гандлёвы цэнтр, і паркінг. Хаюцін не адмаўляе, што іх фінансаванне ішло ў тым ліку за грошы ад продажу аблігацый. Але прадаць ні паркінг, ні гандлёвы цэнтр не атрымалася, як не атрымалася і ўзяць у беларускіх банках крэдыты пад заклад, пабудовы.

І выхад быў знойдзены. Леў Хаюцін распавёў, што СТАА «Тамбаз» прадавала нерухомую маёмасць ЖК «Аркадыя» (адміністрацыйныя памяшканні, машына-месцы) толькі на паперы афіляванай кампаніі «Тамбаз-альянс» з адтэрміноўкай плацяжу на год, а то і больш.

Суддзя Святлана Чарапанава папрасіла абвінавачанага ўдакладніць для чаго.

Хаюцін патлумачыў, што была схема: «Тамбаз» прадаваў толькі на паперы (грошы не пералічваліся) «Тамбаз-альянсу» нерухомую маёмасць па сабекошце. Затым у «Тамбаз-альянсу» гэту ж маёмасць купляла лізінгавая кампанія па рынкавым кошце. Атрыманыя грошы «Тамбаз-альянс» пералічваў СТАА «Тамбаз», якое выплачвала імі крэдыт.

Прасцей кажучы, страты «Тамбаз» перакладаліся на «Тамбаз-альянс». Паводле той жа схемы былі прададзеныя офісныя памяшканні і машына-месцы.

- Навошта гэта ўсё трэба было рабіць праз «Тамбаз-альянс»? - удакладніла суддзя.

- Таму што сабекошт гэтых памяшканняў, якія раней былі жылымі (кватэры на першых паверхах не прадаваліся), а потым былі пераведзеныя ў нежылы фонд, панеслі дадатковыя выдаткі. У выніку ўтварыўся сабекошт, які быў вышэйшы за рынкавы кошт. Для таго каб у «Тамбаз» не было стратаў, прадалі па сабекошце «Тамбаз-альянсу». Гэта было зроблена, каб не было страт у «Тамбаз».

- Для чаго вам трэба было не паказваць страты? - спытала суддзя.

- «Тамбаз» крэдытаваўся ў чатырох банках. Для таго, каб банк працягваў крэдытаваць і не патрабаваў датэрміновай выплаты крэдыту, прадпрыемства не павінна фармаваць страты. Гэта магло прывесці, груба кажучы, да дэфолту. Мы вымушаны былі дзейнічаць паводле такой схемы. Такі ланцужок працуе ўвесь час, - распавёў Хаюцін.

Хто такі Аўсяннікаў?

Падчас суда ўзнікла пытанне, адкуль узяўся Аўсяннікаў - новы ўласнік і генеральны дырэктар СТАА «Тамбаз». Нагадаем, гэта было ў 2017 годзе.

- Акрамя крэдытаў банкаў, мы прыцягвалі інвестараў. Адным з такіх інвестараў быў Канстанцін Бялоў, ён супрацоўнічаў з «Белінтэртранс». Потым, калі ў «Белінтэртранс» пачаліся цяжкасці, туды ўвялі кіраўніка - Аўсяннікава. Яго да мяне прывёў Бялоў, сказаў, што ў мяне цяжкасці і ён дапаможа. Першапачаткова яны ўдваіх [Бялоў і Аўсяннікаў] хацелі ўліць грошы ў кампанію, але па выніку застаўся толькі Аўсяннікаў.

З чаго ўсё пачалося?

«Тамбаз» будаваў жыллё ў Менску больш за 20 гадоў, у кампаніі была выдатная рэпутацыя аж да лета 2017 года, калі спынілася будаўніцтва двух жылых дамоў у комплексе «Аркадыя».

Уладальнікі аблігацый на кватэры ў дамах, што будаваліся - а гэта 640 сем'яў - не дачакаўшыся працягу будаўніцтва, запісалі відэазварот да прэзідэнта, а таксама напісалі ва ўсе інстанцыі з патрабаваннем праверыць «Тамбаз».

Вынікам праверкі і стала распачынанне крымінальнай справы ў дачыненні да Льва Хаюціна, а таксама ўзяцце яго пад варту ў снежні 2017 года.

Было ўстаноўлена, што ў перыяд кіраўніцтва «Тамбаз» Хаюцін, недастаткова ацаніўшы фінансавае становішча фірмы, выпускаў жыллёвыя аблігацыі для будаўніцтва шматкватэрных дамоў. Аднак прынятыя абавязанні кампанія не выканала.

Акрамя таго, робячы ад імя «Тамбаз» эканамічна немэтазгоднымі ўгоды, Хаюцін атрымаў выгоду маёмаснага характару, а грамадства недаатрымала грошы, якія маглі быць накіраваныя на будаўніцтва жылых дамоў, паведамляла Генпракуратура.

Агульная шкода, нанесеная «Тамбаз», склала больш за мільён беларускіх рублёў.