Як у Беларусі плануюць змяніць закон «Аб ахове здароўя»

Змены ў Закон можна абмеркаваць да 30 жніўня.

На грамадскае абмеркаванне вынесены законапраект «Аб ахове здароўя», паведамляе pravo.by. У дакуменце гаворыцца пра стварэнне ў Міністэрстве аховы здароўя камітэта біяэтыкі і аб увядзенні паняцця «экспертыза якасці меддапамогі».

Адна з навін: законапраект прадугледжвае акрэдытацыю для дзяржаўных медычных устаноў. Яна будзе патрэбная, каб вызначыць «адпаведнасць лячэбна-дыягнастычных магчымасцяў дзяржаўнай арганізацыі аховы здароўя ўмовам, тыпам і ўзроўням медыцынскай дапамогі». Як менавіта будзе праводзіцца акрэдытацыя, пазней вырашыць Саўмін.

У праекце гаворыцца, што «даступнасць, этапнасць і пераемнасць усіх тыпаў медыцынскай дапамогі ў дзяржаўных арганізацыях аховы здароўя забяспечваюцца яе аказаннем на розных узроўнях незалежна ад месца жыхарства (месца знаходжання) пацыента».

Законапраект уводзіць паняцце «экспертыза якасці медыцынскай дапамогі», яе будуць праводзіць пры смяротных выпадках, выпадках унутрыбальнічных інфекцый і ўскладненнях, скаргах на якасць медыцынскай дапамогі.

Таксама ў дакуменце з'яўляюцца паняцці «экспертыза прафесійнай прыдатнасці» (яе будуць прызначаць, напрыклад, каб ацаніць, прыдатны чалавек ці не да працы са шкоднымі і (або) небяспечнымі ўмовамі працы) і «экспертыза сувязі захворвання з прафесіяй», якую будуць праводзіць, каб усталяваць, ці ёсць сувязь захворвання з прафесійнай дзейнасцю.

У праекце тлумачыцца, у якіх выпадках будзе праводзіцца абавязковае патолагаанатамічнае анатаміраванне. Гэта будзе неабходна зрабіць сярод іншага «ў выпадку канфліктных сітуацый у працэсе аказання медыцынскай дапамогі».

У Міністэрстве аховы здароўя, згодна з дакументам, плануюць стварыць Камітэт біяэтыкі.

Згодна з законапраектам, у Беларусі з'явіцца цэнтралізаваная інфармацыйная сістэма аховы здароўя, у якой будзе захоўвацца і апрацоўвацца медыцынская інфармацыя. Яна ўключае ў сябе:

звесткі, якія змяшчаюцца ў электроннай медыцынскай карце пацыента і іншых электронных медыцынскіх дакументах;

звесткі, якія змяшчаюцца ў адзіным электронным архіве медыцынскай інфармацыі пра пацыентаў;

звесткі аб арганізацыях аховы здароўя;

звесткі пра асоб, якім аказваецца медыцынская дапамога;

звесткі пра медыцынскія дакументы і звесткі пра арганізацыі аховы здароўя, у якой медыцынскія дакументы створаны і захоўваюцца;

звесткі статыстычнага назірання ў сферы аховы здароўя;

звесткі пра арганізацыю аказання высокатэхналагічнай медыцынскай дапамогі і інш.

Заўвагі і прапановы паводле законапраекта можна выказаць у адмысловай тэме на прававым форуме да 30 жніўня.