Зяленскі абмеркаваў з Трудо непрымальнасць вяртання РФ у G7

Прэзідэнт Украіны і прэм'ер-міністр Канады правялі тэлефонную размову.

22 жніўня прэзідэнт Украіны Уладзімір Зяленскі правёў тэлефонную размову з прэм'ер-міністрам Канады Джасцінам Трудо. Пра гэта паведаміла прэс-служба кіраўніка Украінскай дзяржавы.

«Зяленскі падзякаваў за паслядоўную пазіцыю Канады ў дачыненні да немагчымасці вяртання Расеі ў «Вялікую сямёрку» ва ўмовах агрэсіі, якая прадаўжаецца на Данбасе, і акупацыі Крыму. Ён таксама адзначыў, што ў сітуацыі, калі і далей гінуць украінцы, неабходна не вяртаць Расею ў «сямёрку», а прымушаць яе выконваць свае абавязацельствы», - распавялі ў прэс-службе.

У офісе прэзідэнта падкрэслілі, што Зяленскі падзякаваў Трудо за гатоўнасць прытрымлівацца «той жа прынцыповай пазіцыі аб непрымальнасці вяртання РФ у «Вялікую сямёрку», якую ён прадэманстраваў яшчэ падчас леташняга саміту G7 у Канадзе».

«Прэзідэнт Украіны і прэм'ер-міністр Канады дамовіліся прадоўжыць абмеркаванне праблематыкі процідзеяння агрэсіўнай палітыцы Расеі і абароны інтарэсаў Украіны пасля саміту «Вялікай сямёркі» ў Францыі», - дадалі ў прэс-службе.

Расея ўдзельнічала ў самітах неафіцыйнага клуба найбольш развітых краін свету з 1997 года. Краіны G7 адмовіліся ад фармату «Вялікай васьмёркі» ў сакавіку 2014 года праз анэксію Крыма.

19 жніўня 2019 года на сустрэчы з прэзідэнтам Расеі Уладзімірам Пуціным прэзідэнт Францыі Эмануэль Макрон заявіў, што пытанне вяртання да фармату «Вялікай васьмёркі» і нармалізацыі стасункаў паміж Расеяй і ЕЗ залежыць ад урэгулявання сітуацыі на ўсходзе Украіны.

20 жніўня кіраўнік Белага дома Дональд Трамп адзначыў, што папярэдні амерыканскі прэзідэнт Барак Абама хацеў выхаду РФ з «Вялікай васьмёркі», але, на ягоную думку, «куды больш правільна» было б пакінуць РФ у гэтым блоку.

21 жніўня тэлеканал CNN паведаміў са спасылкай на крыніцу, што Трамп і Макрон дамовіліся запрасіць Расею на саміт G7 у 2020 годзе.

Канцлерка ФРГ Ангела Мэркель і прэм'ер-міністр Вялікай Брытаніі Борыс Джонсан на прэс-канферэнцыі ў Берліне 21 жніўня сышліся ў меркаванні, што вяртанне Расеі ў «Вялікую васьмёрку» было б заўчасным.

Прэзідэнт Украіны Уладзімір Зяленскі 21 жніўня заявіў: «Вяртанне акупаванага Крыма, спыненне баявых дзеянняў на Данбасе і вызваленне больш чым 100 палітычных зняволеных і ўкраінскіх маракоў, якіх утрымлівае Крэмль, будзе сапраўдным сур'ёзным сігналам свету пра тое, што Расея гатовая зноў заняць сваё месца ў парадку дня высокай дыпламатыі».

22 жніўня ў тэлефоннай размове з Зяленскім Джонсан запэўніў украінскага прэзідэнта, што выступіць супраць вяртання Расеі ў G7 на саміце «Вялікай сямёркі» ў Францыі 24-26 жніўня.