IS: У Хельсінкі Пуцін адразу пачаў камандаваць і пагражаць

Фінскае выданне Ilta-Sanomat - развіццё прэзідэнта РФ у Хельсінкі.

Куды б у Расеі Пуцін ні прыехаў, там перакрываюць вуліцы, спыняюць паветраныя злучэнні, закрываюць крамы, вызваляюць дамы, а будні простых расейцаў на шмат гадзін ператвараюцца ў блытаніну - без выбачэнняў, кампенсацый за затрымкі або страту даходаў, піша Ilta-Sanomat (пераклад - inosmi.ru).

Немагчыма падлічыць, колькі працоўных гадзін простыя масквічы і пецярбуржцы змарнавалі падчас прэзідэнцтва Пуціна проста таму, што вялікае эга кіраўніка Крамля і сталая фобія заказнога забойства прымушаюць простых грамадзян краіны сысці са шляху прэзідэнта.

У Хельсінкі Пуцін прыбыў са спазненнем на дзве гадзіны, што нават для яго даволі прыстойна.

А вось тысячам фінаў давялося воляй-няволяй змірыцца са схільнасцю Пуціна спазняцца. У раскладзе рэйсаў, якія прыбываюць у Хельсінкі, пачаўся хаос, пасажырскім суднам давялося чакаць ля мора допуску да прыстані, а аўтамабілі стаялі ў корках.

Прэзідэнту Фінляндыі Саўлі Ніінісцё, які прымае візіт, таксама давялося чакаць. У нейкі момант ён, імаверна, мог задумацца, ці было запрашэнне Пуціна ў Прэзідэнцкі палац добрай ідэяй.

Чаканне Пуціна ў парку летняй рэзідэнцыі прэзідэнта Фінляндыі Култаранта прайшло б значна спакайней як для самога Ніінісцё, так і для простых фінаў.

Самога Пуціну запрашэнне ў Прэзідэнцкі палац, імаверна, усцешыла, бо асаблівыя месцы для сустрэч і пратакольныя сігналы значаць для расейцаў шмат. Невядома, ці меў Ніінісцё на ўвазе нешта асаблівае, запрашаючы Пуціна ў Прэзідэнцкі палац, але ў Крамлі гэта дакладна трактавалі як яшчэ адну прыкмету поспеху пуцінскай палітыкі сілы.

Яшчэ пяць гадоў таму пасля захопу Крыма Еўрапейскі Звяз хацеў пакараць Пуціна, прыпыніўшы міжнародныя сустрэчы высокага ўзроўню. Цяпер Фінляндыя, будучы краінай-старшынёй Еўразвязу, запрашае Пуціна з візітам у парадны палац Хельсінкі.

Прэс-канферэнцыя Пуціна ў Прэзідэнцкім палацы прайшла паводле ўжо знаёмага сцэнару. Часам здавалася, што Пуціну ўсё надакучыла, ён разглядаў столь і паціраў нос.

Твары прэзідэнтаў не азараліся шырокімі ўсмешкамі, хоць абодва хвалілі цяперашнія двухбаковыя стасункі Фінляндыі і Расеі і не знайшлі ў іх праблем.

Аднак на твары Пуціна з'явілася незвычайная ўсмешка, калі фінскія журналісты спыталі ў яго аб падаўленні пратэстаў у Маскве і парушэнні грамадзянскіх правоў расейцаў.

Здаецца, Пуцін нацешыўся магчымасцю зачытаць завучаны прыгожы адказ: Расея, вядома, паважае правы чалавека, у той час як у іншых краінах і нават у Еўропе парой ідзе гаворка пра тысячы параненых маніфестантаў і нават пра гібель удзельнікаў мітынгаў.

Пуцін актыўна практыкуе майстэрства адказаў у стылі «на сябе паглядзіце», і на вялікіх прэс-канферэнцыях ён можа бліснуць ім, бо прысутным журналістам не даюць магчымасці задаць другое пытанне або прывесці контраргумент.

Самая сур'ёзная частка прэс-канферэнцыі закранула пытанні гонкі ўзбраенняў, удзельнічаць у якой Расея, са слоў Пуціна, вымушаная праз дзеянні ЗША.

Калі фінскія журналісты спыталі Пуціна пра аварыю ў Архангельскай вобласці, падчас якой адбыўся выцек радыяцыі, і выказалі занепакоенасць наступствамі для бяспекі Фінляндыі ў выпадку правядзення новых выпрабаванняў узбраенняў, у Пуціна не ўзнікла заклапочанасці ў дачыненні да магчымага радыяцыйнага заражэння простых фінаў.

Аднак Уладзімір Пуцін усё ж прызнаў, што на выпадак здарэнняў абмен інфармацыяй усё ж можна было б палепшыць, хоць у пытаннях вайсковай таямніцы свабодны абмен інфармацыяй немагчымы.

Само сабой, на прэс-канферэнцыі паведамлялася, што Расея і Амерыка цяпер вядуць гонку ўзбраенняў, у якую мы, еўрапейцы, пакутнікі і паддоследныя трусы, можам быць уцягнутыя. Пуцін даў зразумець, што Расея адкажа на нядаўняе выпрабаванне ракеты ў ЗША «сіметрычнымі дзеяннямі», гэта значыць, новымі тэстамі сваёй ядзернай зброі і распрацоўкамі новых узбраенняў.

«Нам, безумоўна, патрэбен дыялог у гэтых пытаннях. (...) Але бяспека Расеі будзе надзейна гарантаваная», - заявіў Пуцін тонам, які можна ўспрыняць толькі як утоеную пагрозу.

Для бяспекі Фінляндыі, Еўропы і ўсяго астатняга свету пуцінскае «абяцанне аб гарантаванні бяспекі» азначае наступленне яшчэ больш цяжкіх часоў.