«Еўрапейская Беларусь» фармуе ініцыятыўныя групы для ўдзелу ў выбарчай кампаніі
6- 23.08.2019, 13:46
- 18,337
Чым больш нас будзе, тым мацней будзе гучаць наш голас.
Актывісты Еўрапейскай Беларусі возьмуць удзел у парламенцкай кампаніі. Пра гэта гаворыцца ў заяве, тэкст якой публікуе сайт Сharter97.org:
- У Беларусі пачалася парламенцкая кампанія. Улады разлічваюць правесці яе па сваім сцэнары - без удзелу рэальных праціўнікаў дыктатара і без сумленнага падліку галасоў. Нас зноў паспрабуюць пазбавіць права выбару.
Наша мэта - рэалізаваць свой сцэнар. Менавіта таму актывісты «Еўрапейскай Беларусі» возьмуць удзел у парламенцкай кампаніі.
Нашым пасланнем стане:
- адстаўка дыктатара, правядзенне свабодных выбараў і змена ўлады на ўсіх узроўнях;
- забеспячэнне годнай працы для беларусаў на радзіме;
- закрыццё АЭС у Астраўцы.
Мы ўдзельнічаем у кампаніі, каб абараніць сваю свабоду і стварыць нармальную еўрапейскую краіну, каб вярнуць нам нашу дзяржаву. Гэтага мы можам дамагчыся толькі разам.
Галоўная задача на сённяшні дзень - стварэнне ініцыятыўных групаў па вылучэнні кандыдатаў у дэпутаты, збор подпісаў і рэгістрацыя кандыдатаў у акруговых выбарчых камісіях. Чым больш нас будзе, тым грамчэй будзе гучаць наш голас.
Грамадзянская кампанія «Еўрапейская Беларусь» і нашыя паплечнікі па Беларускім Нацыяальным Кангрэсе вылучаюць сваіх кандыдатаў у дэпутаты ў Мінску, усіх абласных цэнтрах і буйных гарадах краіны. Нам патрэбна ваша дапамога ў кожным з гэтых населеных пунктаў.
Далучайцеся!
Наш кантактны тэлефон / тэлеграм / вайбер: + 375 29 5494923.
Жыве Беларусь!