Як 62-гадовы жыхар Слуцка змяніў жыццё і схуднеў на 30 кілаграмаў

Ён з лёгкасцю робіць 60 прысяданняў.

Анатолю 62 гады. Дзесяць гадоў таму праз няправільнае харчаванне і малую рухомасць ён моцна паправіўся, сталі балець ногі, з'явілася задышка. Пагаршэнне самаадчування прымусіла яго перагледзець рацыён і заняцца гімнастыкай, піша сайт kurjer.info.

За дзесяць гадоў ён схуднеў на 30 кілаграмаў і з лёгкасцю робіць 60 прысяданняў.

У маладосці Анатоль займаўся фізкультурай і спортам. У тыя гады да фізічна моцных хлопцаў ставіліся з павагай. Меркавалася, што яны могуць абараніць блізкіх і пастаяць за сябе пры неабходнасці. Старэйшы брат Анатоля, Мікалай, пасля службы ў войску сказаў яму: «Толя, у войску ўсё сур'ёзна, калі ты загадзя падрыхтуешся, табе будзе лягчэй».

Анатоль запісаўся ў секцыю спартовай гімнастыкі і заняўся боксам. У войску (служыў у Нямеччыне ў складзе групы савецкіх войскаў) прадоўжыў заняткі спортам, таму лёгка пераносіў нагрузкі.

Пасля войска і заканчэння тэхнікума ён размеркаваўся на цукровы завод, на якім прапрацаваў больш за 40 гадоў. Пачаліся працоўныя будні, потым жаніцьба, дзеці, і спорт адышоў на задні план, а потым і зусім на яго часу не засталося.

З узростам і лішняй вагай «вылезлі» хваробы

«Да 52 гадоў я моцна паправіўся, сталі балець ногі і суставы. Калі падымаўся на пяты паверх, спыняўся, таму што з'явілася задышка, - распавёў Анатоль. - Гэта прымусіла мяне задумацца, што нешта трэба мяняць. Хацелася заставацца бадзёрым і актыўным. Я ўспомніў, што спорт дапамог мне ў маладосці, таму наважыў вярнуцца да рэгулярных трэніровак. Для пачатку купіў трэнажоры: ровар і дарожку, эспандэр для рук, эспандэр кісцевы і гантэлі.

Як выбіраў трэнажоры

Ровар - адзін з найлепшых сродкаў для кардыётрэніровак і распрацоўкі рухомасці суставаў. Бегавую дарожку выбраў не магнітную, а электрычную, бо магнітная круціцца, калі бяжыш, а калі хітруеш, то яна рухаецца павольней. На электрычнай жа хуткасць задаецца пастаянная, і гэта стымулюе ісці ў бесперапынным тэмпе і выконваць пэўную норму. Бывае, што спачатку не хочацца, але задаў хаду з хуткасцю 7 км/г, і ідзеш з зададзенай хуткасцю.

Зарадку я раблю кожны дзень, акрамя нядзелі. Калі трэба было на працу да 8 гадзін, то ўставаў а 5.30 і гадзіну займаўся на трэнажорах. На трэнажорах займаўся не кожны дзень, а 2-3 дні на тыдзень. Рухальную актыўнасць дапаўняла будоўля на лецішчы, таму калі прыязджаў дадому занадта позна, то назаўтра ехаў на працу на ровары замест машыны.

Аб комплексе практыкаванняў

На зарадку, як правіла, у мяне сыходзіць 18 хвілін. У комплексе блізу 12 практыкаванняў. Пачынаю па парадку, зверху ўніз. Спачатку практыкаванні для галавы, шыі, кістак рук, суставаў рук, сцёгнаў, каленяў і стоп. Гэта павароты, кручэнні, развядзенне, нахілы. Я не вынаходзіў нічога новага, а абраў тыя практыкаванні, якія рабілі на размінцы ў школе, а потым у войску.

Кожны дзень я выконваю адцісканні і прысяданні з выцягнутымі рукамі, бо прачытаў, што 90 прысяданняў замяняе 3 км бегу. Спачатку я мог выканаць 30 прысяданняў, а цяпер раблю па 60. Рэкорды ставіць не збіраюся, хачу захаваць рухомасць і бадзёрасць.

Кожны дзень знаходжу для сябе аптымальныя заняткі, якія даюць пасільную нагрузку, у нашым узросце нельга перапрацоўвацца і рабіць штосьці праз сілу.

З таго моманту, як я вярнуў фізкультуру ў сваё жыццё, скінуў 30 кг. Стаў лепш сябе адчуваць, пры звычайнай нагрузцы ногі не баляць. Яны даюць аб сабе ведаць толькі, калі перапрацаваў на лецішчы ці падымаеш нешта цяжкае на 5-ы паверх. У мяне добры сон і ціск у норме.

Аб харчаванні

Разам з зарадкай я змяніў сёе-тое ў харчаванні. Паменшыў свае порцыі, пры гэтым арыентаваўся на вайсковыя або тыя, якія даюць у сталовай. Прадукты ем розныя, але аддаю перавагу гародніне і сезоннай садавіне, хоць і сала з мясам не выключыў з рацыёну.

Жонка ўхваляе, што я змяніў лад жыцця, але сама яшчэ не далучылася да мяне, думае».