22 жнiўня 2019, Чацвер, 21:57
Мы ў адной лодцы
Рубрыкі

Следства аб справе смерці інспектара ДАІ ў Магілёве закончанае

Следства аб справе смерці інспектара ДАІ ў Магілёве закончанае
ФОТА: АЛЯКСАНДР РУЖАЧКА

Няма «грамадска небяспечнай дзеі».

Папярэдняе расследаванне крымінальнай справы паводле факту забойства супрацоўніка ДАІ ў Магілёве закончанае, паведаміў tut.by бацька Яўгена Патаповіча. Прычына - «адсутнасць грамадска небяспечнай дзеі». Такі адказ Уладзіміру Патаповічу даў Следчы камітэт.

Увечары 16 траўня, нагадаем, з'явілася паведамленне аб тым, што ў Магілёве выкрадзены супрацоўнік міліцыі. Увесь асабовы склад міліцыі Магілёўскай вобласці паднялі на трывогу, на дарогах усёй краіны выставілі блок-пасты. Шукалі чорную «Волгу» з расейскім рэгістрацыйным нумарам. Паводле першапачатковай версіі, супрацоўніка ДАІ ў чорную «Волгу» заштурхалі трое невядомых асоб цыганскай або каўказскай знешнасці ў мікрараёне Чапаеўка і вывезлі ў невядомым кірунку. Праз некалькі гадзін стала вядома, што цела зніклага лейтэнанта Яўгена Патаповіча знайшлі ў лесе. Афіцыйна паведамлялася аб агнястрэльнай ране галавы. СК распачаў крымінальную справу паводле арт. 362 КК РБ «Забойства супрацоўніка органаў унутраных спраў».

А 20 траўня СК паведаміў, што асноўная версія гібелі супрацоўніка ДАІ ў Магілёве - суіцыд. Пазней аб гэтай версіі як адзінай прыярытэтнай заявіў і ўжо былы кіраўнік МУС Ігар Шуневіч.

Кіраўнік СК Іван Наскевіч пазней удакладніў, што спачатку справа сапраўды расследавалася як «наўмыснае забойства», але потым на падставе вынікаў экспэртыз следства разглядала прыярытэтнай версію пра тое, што Яўген Патаповіч скончыў жыццё самагубствам.

Бацькі Патаповіча распавядалі, што ў версію суіцыду яны не вераць, бо не бачылі, каб у сына былі на гэта нейкія прычыны. «Ён планаваў жыццё і вяселле», - распавядалі яны. Бацька і маці патрабавалі эксгумацыі цела сына. Тлумачылі: у іх былі і застаюцца падазрэнні ў тым, што кулявая рана была не адзінай на целе сына. Насцярожыла іх таксама тое, што нікога са сваякоў не пусцілі ў морг.

Але следства ў эксгумацыі адмовіла. Хадайніцтва прызнаць бацькоў пацярпелымі паводле справы таксама было адхіленае. А следчы праз тэлефон распавядаў бацьку, што экспэртыза закончаная і «ў выніках паказана, што на целе ёсць толькі кулявая рана».

Бацька інспектара Уладзімір Патаповіч распавядаў, што ён не задаволены адмовай у эксгумацыі і накіраваў звароты ў Генеральную пракуратуру і адміністрацыю Лукашэнкі. Генпракуратура таксама адказала адмовай - патлумачыла яе «адсутнасцю падстаў» для эксгумацыі.

- Адказ з адміністрацыі я яшчэ чакаю. Яны давалі прамежкавы пра тое, што накіравалі запыт у кампетэнтныя органы. Атрымаўшы яго, адкажуць і мне, - распавёў Уладзімір Патаповіч. - Я таксама напісаў заяву ў Следчы камітэт з просьбай вывучыць матэрыялы справы, калі расследаванне закончанае. Адказ пакуль таксама чакаю.