18 жнiўня 2019, Нядзеля, 2:55
Мы ў адной лодцы
Рубрыкі

Эканаміст: Узаемадзеянне з Кітаем пачынае станавіцца камічным

8
Эканаміст: Узаемадзеянне з Кітаем пачынае станавіцца камічным

Чаму ў Беларусі з'яўляюцца праблемныя прадпрыемствы, пабудаваныя кітайцамі.

Эканаміст Сяргей Чалы закрануў тэму кітайскіх інвестыцый у беларускую эканоміку, піша «Салідарнасць». Экспэрт адзначыў, што дзве нарады з удзелам Лукашэнкі былі рознымі па характары: на адной прагучала досыць шмат негатыву ў бок кітайскіх інвестараў, на другой, прысвечанай будаўніцтву стадыёна і басейна, улады паспрабавалі згладзіць вуглы.

- Узаемадзеянне з Кітаем пачынае станавіцца камічным, - заўважыў эканаміст. А на рэмарку вядоўцы праграмы аб тым, што ўзаемадзеянне яшчэ і вельмі дарагое для краіны, дадаў, што ніхто нас не прымушаў будаваць прадпрыемствы на сотні мільёнаў.

З ягоных слоў, ідэя імпартазамяшчэння ў Беларусі паступова вылілася ў гігантаманію:

- Спачатку мы глядзім на тое, што імпартуем. Затым думаем, ці можна гэта вырабляць у сябе. Чаму б і не. Потым высвятляецца, што гэта каштуе вельмі дорага, рынак недастатковы, значыць, трэба ўсё гэта кудысьці экспартаваць. Вось так у нас і нараджаюцца прамысловыя гіганты, якія потым няма куды падзець.

Сяргей Чалы патлумачыў, чаму ў краіне з'яўляюцца праблемныя прадпрыемствы накшталт Светлагорскага ЦКК. І прывёў у прыклад адрэстаўраваны стадыён «Дынама»:

- Памятаеце казырок, які не цалкам накрываў трыбуны? А ліўневую каналізацыю з вывадам даслоўна пад ногі? Гэта ўсё таму, што ў нас любяць займацца патанненнем. Не многія ў свеце гатовыя рабіць так, таму што танней ужо проста немагчыма. А ў Кітаі могуць. Там вам не скажуць, што так рабіць нельга.

На думку экспэрта, Кітай проста выконвае нашы жаданні:

- Хочаце танней? Зробім вам танней. А тое, што гэта атрымаецца з руйнаваннем даху, і потым будзе не зразумела, што з гэтым рабіць, то гэта ўжо вашы праблемы.

Эканаміст падзяліўся назіраннем: пакуль Кітай будаваў у Беларусі інфраструктурныя аб'екты, якія не прыносілі наўпроставага прыбытку, асаблівых праблем не ўзнікала. Але як толькі зайшла гаворка аб інвестыцыйных праектах кшталту светлагорскага завода, запрацаваў прынцып «скупы плаціць двойчы».