18 верасня 2019, Серада, 4:41
Мы ў адной лодцы
Рубрыкі

Суд вынес прысуд падлетку, які забіў вучня і настаўніка ў Стоўбцах

65
Суд вынес прысуд падлетку, які забіў вучня і настаўніка ў Стоўбцах
Фота: ТАСС

Справа слухалася ў закрытым рэжыме.

Былы вучань стаўбцоўскай школы прызнаны вінаватым у забойстве настаўніка і 11-класніка, а таксама ў замаху на забойства ў дачыненні да яшчэ двух школьнікаў. Прысуд суда - 13 гадоў пазбаўлення волі ў выхаваўчай калоніі. Праз узрост абвінавачанага справа слухалася ў закрытым рэжыме, публічна абвясцілі толькі прысуд, піша tut.by.

Трагедыя адбылася 11 лютага. Вучань 10 класа Вадзім М. прыйшоў на заняткі загадзя, а 7.40. Пакінуў партфель і выйшаў з кабінета. Затым вярнуўся і з нажом напаў на настаўніцу гісторыі Марыну Пархімовіч, якая павінна была весці першы ўрок. За педагога паспрабавалі ўступіцца два аднакласнікі, у выніку яны атрымалі раненні. Пасля гэтага абвінавачаны выбег з класа, зайшоў у суседні кабінет, дайшоў да апошняй парты і напаў на вучня 11-га класа Аляксандра Раманава, хлопец памёр на месцы. Вадзім збег, але праз дзве гадзіны яго затрымалі. У заплечніку ў яго знайшлі малаток, а пры асабістым даглядзе - дымавыя шашкі і петарды. Так храналогію тых падзей апісваў Следчы камітэт.

Пра загінулую настаўніцу яе былыя вучні адклікаліся самымі цёплымі словамі. Сашу Раманава апісвалі як мэтанакіраванага і прыязнага хлопца. Пра Вадзіма казалі, што ён быў спакойным і бесканфліктным, добра вучыўся і не меў праблем з паводзінамі. Ніхто не мог паверыць, што ён здольны на такое злачынства. Таму матыў - што рухаў падлеткам - выклікаў заканамерныя пытанні ў многіх.

Вадзіма М. прызналі вінаватым у забойстве двух асоб з асаблівай жорсткасцю з хуліганскіх меркаванняў, замаху на забойства двух асоб з асаблівай жорсткасцю з хуліганскіх меркаванняў і асабліва злосным хуліганстве. Вядома, што пракурор прасіў для Вадзіма М. 13 гадоў пазбаўлення волі - гэта максімальна магчымы тэрмін з улікам таго, што на момант учынення злачынства падлетку было менш за 16 гадоў.

Згодна з вынікамі медыцынскага агляду, падлетак не знаходзіўся ні ў стане алкагольнага ап'янення, ні пад уздзеяннем наркатычных і псіхатропных рэчываў. Псіхолага-псіхіятрычная экспертыза паказала, што Вадзім М. у поўнай меры мог усведамляць значэнне сваіх дзеянняў і кіраваць імі. Сваю віну абвінавачаны прызнаў часткова.

Судовае пасяджэнне праходзіла ў закрытым рэжыме, бо на момант учынення злачынства школьніку было менш за 16 гадоў. Акрамя таго, у матэрыялах справы ўтрымліваюцца звесткі пра стан яго здароўя - медычная таямніца.

Адзначым, што пастанова суда пакуль не ўступіла ў законнае дзеянне і можа быць абскарджаная ў Вярхоўным судзе.