Le Parisien: Шумахер праз шэсць гадоў выйшаў з комы

Прадстаўнікі бальніцы пакуль сітуацыю не каментуюць.

Газета Le Parisien паведаміла, са спасылкай на крыніцу ў парыжскай бальніцы імя Жоржа Пампіду, пра тое, што знакаміты нямецкі гоншчык Міхаэль Шумахер «знаходзіцца ў свядомасці», паведамляе RFI.

Газета, у між іншым, спасылаецца на заяву неназванай супрацоўніцы бальніцы. Супрацоўніца сцвярджае, што 50-гадовы Шумахер, які «знаходзіцца ў свядомасці», праходзіць лячэнне ў «яе аддзяленні».

Паводле звестак Le Parisien, у аўторак, 10 верасня гоншчыка наведваў у шпіталі Жан Тодт, прэзідэнт Міжнароднай аўтамабільнай федэрацыі (FIA), які ў «залатыя» гады Шумахера быў спартовым дырэктарам каманды Ferrari.

Як сцвярджае газета, лячэннем славутага спартоўца займаецца 69-гадовы прафесар Філіп Менашэ, які ўзначальвае ў клініцы ім. Жоржа Пампіду аддзяленне сардэчна-сасудзістай хірургіі. Паводле інфармацыі выдання, да гэтага Шумахер знаходзіўся ў гэтай парыжскай клініцы «як мінімум два разы» «мінулай вясной».

У сваю чаргу, Дырэкцыя дзяржаўных бальнічных устаноў Парыжа (AP-HP), з якой звязалася агенцтва France-Presse, не стала «ні пацвярджаць, ні зняпраўджваць» інфармацыю, спасылаючыся на медычную таямніцу.

Нагадаем, сяміразовы чэмпіён «Формулы-1» Міхаэль Шумахер прыкаваны да ложка больш за пяць гадоў - з таго часу, як 29 снежня 2013 года атрымаў чэрапна-мазгавую траўму пасля падзення на французскім гарналыжным курорце Мерыбель. У чэрвені 2014 года лекары вывелі Шумахера з медыкаментознай комы. З тых часоў паступала мала інфармацыі пра яго стан, бо сям'я старалася захоўваць яе ў строгім сакрэце.