«Слуга народа» хоча датэрміновыя выбары ў сталіцы Украіны
25- 12.09.2019, 15:15
- 9,272
У партыі Зяленскага мяркуюць, што Клічко не спраўляецца з кіраваннем Кіевам.
Украінскі нардэп ад "Слугі народа" Аляксандр Ткачэнка мяркуе мэтазгодным правядзенне датэрміновых выбараў у Кіеве для поўнай перазагрузкі ўлады.
Пра гэта паведамляе "Украінская праўда".
"Сёння стала вядома, што сесія Кіеўскай рады, скліканая з ініцыятывы мэра, не змагла сабрацца на сваю сесію. Гэта стала пацвярджэннем няздольнасці Віталя Клічко кіраваць горадам. Адсутнічае адзінства каманды і падтрымка кіяўлянаў.
Напэўна, час зрабіць поўную перазагрузку ўлады і правесці датэрміновыя выбары ў Кіеве – як Кіеўскай рады, так і мэра. Карупцыя, засілле забудоўнікаў, ігнараванне элементарных патрэбаў супольнасцяў горада – павінны сысці ў мінулае", – заявіў Ткачэнка.
Паводле словаў Ткачэнкі, усё гэта можна будзе зрабіць паводле новага закона аб сталіцы, над якім цяпер працуюць дэпутаты і профільныя спецыялісты.
Ён удакладніў, што новы закон будзе прадугледжваць еўрапейскія нормы кіравання горадам, дэцэнтралізацыю, аднаўленне народаўладдзя ў раёнах, а таксама "дакладную і празрыстую" структуру кіравання сталіцай.
Паводле звестак журналістаў, каманда Зяленскага разглядала кандыдатуры Ткачэнкі і Андрэя Холадава на пасаду старшыні КГГА.
Таксама ў жніўні Ткачэнка дапускаў, што можа балатавацца ў мэры Кіева.
Але ў верасні на пытанні журналістаў пра магчымы ўдзел у выбарах мера Кіева ён не аспрэчваў, але і не пацвярджаў гэтую інфармацыю, а проста аджартоўваўся.