Скандал у гомельскай школе: Хто вінаваты?

І гэта якраз той выпадак, калі галоўныя вінаватыя – не бакі канфлікту.

Скандал у гомельскай школе, дзе 11 верасня падчас урокаў настаўніца вылаялася матам на вучня чацвёртага класа, трымаючы ў руках над ім парту, выклікаў бурную рэакцыю. Не прайшло і пары дзён з моманту апублікавання відэа, як настаўніца страціла сваю пасаду, піша «Салiдарнасць».

Усё было ажыццёўлена ў найлепшых традыцыях нашай сістэмы адукацыі: школу наведала прадстаўнічая камісія з аблвыканкама, для бацькоў чацвертаклашак, пры якіх усё і адбылося, правялі адмысловы сход, настаўніцу звольнілі.

Здавалася б, сітуацыя адназначная: настаўніца дзейнічала, мякка кажучы, далёка за рамкамі педагагічных стандартаў. Аднак калі паглядзець на рэакцыю, то думкі пра гэтую гісторыю ва ўсіх розныя. Больш за тое, нават самі бацькі вучняў, у чыім класе адбыўся інцыдэнт, гатовыя абараняць настаўніцу.

– Можа, варта перагледзець пастанову? Так, Людміла Іванаўна паступіла некарэктна, пытанняў няма. Але мы ведаем яе – гэта добры педагог, дасведчаны. Да яе летась, калі яна набірала першы клас, усе хацелі трапіць, бацькі ледзь не біліся, – апавядалі бацькі, адзначаючы, што «так, яна настаўніца – і нядобра выйшла, але нервы ва ўсіх здаюць».

Некаторыя ж упэўненыя, што педагог, які сабе такое дазваляе «прафнепрыдатны і не павінен больш працаваць».

Пра неадназначную сітуацыю кажа і рэакцыя карыстальнікаў сеткі. «Стамілася, выгарала – складаная праца, а дома бездапаможны стары чалавек. Гэта вельмі цяжка», – адзначаюць каментатары на дыскусійнай пляцоўцы talks.by.

«Бацькам варта выклікаць у дзяцей павагу да педагогаў і да сваіх аднакласнікаў, і якую-ніякую дысцыпліну, а не ўсёдазволенасць».

«Выдатна яе разумею. У самой стаж выкладання 27 гадоў. Часам хочацца забіць, асабліва бацькоў, якія патураюць свайму гадзяняці. Пакуль трымаюся, але з кожным годам усё цяжэй. Шкада, што прыбралі выслугу гадоў. Нават 25 гадоў у настаўнікаў – гэта ўжо поўнае выгаранне».

Іншыя ж, наадварот, абураныя сітуацыяй.

«Настаўнік – гэта настаўнік. У яго не павінна быць такіх словаў: “на могілкі цябе панясуць” і г. д. Што б ні адбывалася, прыніжаць і абражаць дзяцей недапушчальна! Правінілася дзіця – выкліч бацькоў у школу. Навошта ж свой твар перад дзецьмі страчваць. адпрацавала яна сваё, вось і здалі нервы, тым больш што пенсія вось ужо».

«Калі педагог са стажам 37 гадоў не можа паставіць на месца 8-9-гадовага вучня, гэта азначае, што яму ўжо час пакінуць выкладанне. А зрывацца на тых, хто адпачаткава меншы і слабейшы, не можа адказаць – гэта проста нізка».

«Добра, што відэа выйшла ў паблік. Інакш бы і далей прадаўжалася. А потым – ах, за што гэта хтосьці там забіў у школе педагога?»

А вось яшчэ адзін характэрны каментар:

«Сучасныя школы – гэта пекла і пагібель, добрыя настаўнікі і дырэктары з кожным годам адыходзяць. Мне як маладому спецыялісту плацяць 100 б.р і запалохваюць увесь час, могуць адправіць весці прадметы нават не майго профілю! Бяжыце людзі са школы, а тыя, хто думае паступаць у пед, – не ідзіце, марнаванне часу, сілаў і здароўя».

І гэта сапраўды тая сітуацыя, у якой складана знайсці аднаго вінаватага, таму што вінаватыя ўсе.

Ці мела права настаўніца так паводзіць сябе і ці могуць увогуле быць у лексіконе педагога выразы: «табе п***ц будзе!» Вядома, не.

Ці вінаватае дзіця ў тым, што дазволіла сабе непавагу да настаўніцы? Так, несумненна.

Ці вінаватыя бацькі ў тым, што не патлумачылі свайму дзіцяці, як трэба сябе паводзіць у школе, і элементарныя правілы павагі да дарослых і людзей увогуле? Так, вінаватыя.

Але ёсць у гэтай сітуацыі яшчэ адзін вінаваты, які нібыта і не ўдзельнічаў у канфлікце, аднак больш за ўсё мае дачыненне да яго ўзнікнення. Той, хто стварыў і падтрымлівае цяперашнюю сістэму адукацыі, якая выклікала падобную сітуацыю.

Той, хто мізэрнымі заробкамі і зневажальнымі нехарактэрнымі абавязкамі панізіў статус настаўніка ніжэй за плінтус, так, што вярнуць павагу да яго будзе складана яшчэ вельмі доўга.

Той, хто ператварыў педагогаў у зборшчыкаў макулатуры, перапісчыкаў насельніцтва, ідэолагаў, наглядчыкаў, загоншчыкаў у БРСМ і галоўных правадыроў «палітыкі партыі».

Той, хто прымусіў сысці са школаў найлепшых, свабодалюбных і здольных адстойваць сваё гледзішча.

У гэтага вінаватага можа быць адно імя, а можа быць і шмат. Таму што гэта цэлая сістэма, выбудаваная ў краіне за дзесяцігоддзі. Сёння мы пажынаем яе плён. А ўжо ў тым, чаму гэта адбылося, вінаватыя мы самі.