Больш за 100 жыхароў Берасця зноў выйшлі на акцыю супраць акумулятарнага завода

Такія сустрэчы праходзяць тут кожную нядзелю ўжо больш за 6 месяцаў.

У нядзелю на плошчы Леніна ў Берасці зноў сабраліся праціўнікі будаўніцтва акумулятарнага завода. Такія сустрэчы праходзяць тут кожную нядзелю з 25 лютага 2018 года.

Паводле інфармацыі праваабаронцы Рамана Кісляка, на сённяшнюю сустрэчу прыйшлі прыкладна 120 чалавек.

Міліцыя праз мегафон папярэджвала сабраных аб адказнасці за правядзенне несанкцыянаванай акцыі.

Людзі, якія прыйшлі на плошчу, абмяркоўвалі ўдзел у парламенцкай кампаніі чатырох супраціўнікаў будаўніцтва акумулятарнага завода, пішуць naviny.by.

Так, жыхар Бярозы, блогер, сябра Аб'яднанай грамадзянскай партыі Аляксандр Кабанаў мае намер вылучыцца па Берасцейскай Заходняй выбарчай акрузе №1, берасцеец Раман Кісляк - па Берасцейскай Цэнтральнай выбарчай акрузе №2, жыхарка Берасцейскага раёна Алена Макарэвіч - па Берасцейскай Усходняй выбарчай акрузе №3, жыхар Кобрына Уладзімір Мароз - па Берасцейскай Памежнай выбарчай акрузе № 4.

На сёння зарэгістраваныя ініцыятыўныя групы Кабанава, Кісляка і Макарэвіч. На наступным тыдні акруговы выбаркам разгледзіць дакументы Мароза. У ініцыятыўную групу Кабанава ўвайшлі 57 чалавек, Кісляка і Макарэвіч - па 72, Мароза - 73.

Як паведаміў БелаПАН Кабанаў, актывісты чакаюць рэгістрацыі ініцыятыўнай групы Мароза, а затым будуць праводзіць адзіныя пікеты за ўсіх чатырох актывістаў.

«Мы хочам, каб гэта былі магутныя, запамінальныя пікеты. І цяпер мы вядзем тэхнічную падрыхтоўку да iх правядзення», - адзначыў Кабанаў.

Плануецца, што пікеты будуць праводзіцца штодня ў пяці-шасці пунктах Берасця.

Адзін з лідараў грамадскай кампаніі супраць будаўніцтва завода Дзмітрый Бекалюк упэўнены, што за іх прадстаўнікоў людзі будуць падпісвацца.

«Я не сумняваюся ў разумным сэнсе жыхароў рэгіёну, бо пра сітуацыю з акумулятарным заводам увесь час распавядаюць мясцовыя блогеры і незалежныя СМІ, - сказаў ён. - Удзел нашых актывістаў у парламенцкай кампаніі - гэта яшчэ адзін крок да таго, каб закрыць завод».

Пасля сустрэчы на плошчы, якая прадаўжалася прыкладна да 12:40, супраціўнікі будаўніцтва завода прайшлі па цэнтральных вуліцах Берасця - Пушкінскай і Савецкай - да кінатэатра «Беларусь».