Бунт у Бураціі: Мітынг ва Улан-Удэ сабраў тысячу чалавек
1- 16.09.2019, 9:05
- 14,509
Пратэстоўцы сустрэлі прадстаўніка ўлады крыкамі «Прэч» і «Ганьба».
Ва Улан-Удэ ў нядзелю, 15 верасня, прайшоў санкцыянаваны мітынг апазіцыі. Людзі выступілі супраць паліцэйскага самавольства і запатрабавалі правядзення сумленных выбараў. Паводле розных ацэнак, у акцыі ўдзельнічалі ад 700 да 1000 чалавек. На мітынгу выступіў у тым ліку кіраўнік Бураціі Аляксей Цыдзенаў, паведамляе dw.com.
Удзельнікі мітынгу сустрэлі Цыдзенава крыкамі "Прэч" і "Ганьба", паведамляе "МК у Бураціі". Калі кіраўнік Бураціі на некалькі хвілінаў падняўся на сцэну, людзі запатрабавалі, каб ён сышоў у адстаўку. Неўзабаве Аляксей Цыдзенаў, які заявіў, што гатовы "ўбаку" адказаць на пытанні мітынгоўцаў, пакінуў мерапрыемства.
Акрамя таго, перад прысутнымі выступілі дэпутат рэгіянальнага парламента Баір Цырэнаў і сенатар Вячаслаў Мархаеў, які саступіў на нядаўніх выбарах мэра Улан-Удэ. На мітынгу былі прадэманстраваныя кадры парушэнняў на выбарах 8 верасня.
Пратэсты ва Улан-Удэ
Пратэсты ў сталіцы Бураціі пачаліся 9 верасня, калі на плошчы Саветаў ва Улан-Удэ сабраліся прыхільнікі шамана Аляксандра Габышава, які пешшу ішоў у Маскву "выганяць" прэзідэнта РФ Уладзіміра Пуціна. Пазней да іх далучыліся дэпутат Цырэнаў і сенатар Мархаеў. Яны адмовіліся прызнаць вынікі галасавання 8 верасня.
У выніку на плошчы пачаліся сутыкненні паміж АМАПам і актывістамі, некалькі чалавек атрымалі раненні, некаторыя ўдзельнікі дэманстрацыі былі затрыманыя. Бестэрміновая акцыя доўжылася некалькі дзён.