Беларусы «апантаныя дыетай» больш за аргентынцаў, але менш за палякаў
4- 16.09.2019, 19:54
- 9,845
Кулінарны сайт распавёў, жыхары якіх краін больш за ўсё набіраюць запыты ў пошукавіку, звязаныя з дыетамі.
Прысвечаны кулінарыі сайт chefspencil.com высветліў, жыхары якіх краін больш за ўсё набіраюць у пошукавым радку Google запыты, звязаныя з дыетамі і здаровым харчаваннем, паведамляе belmir.by.
Для гэтага супрацоўнікі гэтага сайта скарысталіся інструментам Google Trends з аналізам запытаў, зробленых жыхарамі 60 краін, у тым ліку на іх родных мовах.
У выніку Беларусь была прыкладна ў сярэдзіне, на 24-м месцы. На першай жа пазіцыі знаходзіцца Польшча. Затым ідуць Аўстралія, ЗША, ПАР і Малдова.
У самым канцы ж пераліку былі краіны Лацінскай Амерыкі. На апошняй радку - Аргенціна, трохі перад ёй - Бразілія і Мексіка. Замыкаюць пяцёрку Тайланд і Гішпанія.
Калі параўноўваць Беларусь з іншымі краінамі былога СССР, то Грузія цікавіцца дыетамі значна больш. Яна заняла ў спісе 6-е месца.
А вось Расея, Украіна і Казахстан знаходзяцца прыкладна на адным узроўні з намі - 20-я, 22-я і 23-я пазіцыі адпаведна. Літве ж тэма цікавая менш. Гэтая прыбалтыйская краіна - на 33-м месцы.