Археолагі знайшлі месца, дзе маглі ўпершыню ўбачыць уваскрэслага Хрыста

Пра рэальнае існаванне паселішча Эмаўс навукоўцы спрачаліся доўгія гады.

Археолагі, магчыма, выявілі біблейскую вёску, у якой, паводле Евангелля ад Лукі, двое вучняў Ісуса ўпершыню сустрэлі яго пасля распяцця. Пра гэта піша Live Science.

У Евангеллі ад Лукі апісваецца, як пасля распяцця Ісуса два вучні ішлі ў вёску Эмаўс. Па дарозе туды незнаёмы спытаў у падарожнікаў, што адбылося ў Ерусаліме. Дабраўшыся да Эмаўса і спыніўшыся там на абед, незнаёмец адкрыў, што ён і быў Ісусам.

Зрэшты, аб рэальным існаванне паселішча Эмаўс навукоўцы спрачаюцца доўгія гады. Паводле адной са здагадак, гэтая біблейская вёска з'яўляецца паселішчам Кірыяф-Іярым. Пра гэта гаворыцца і ў новым расследаванні, якое будзе апублікаванае ў серыі «Новыя даследаванні ў археалогіі Ерусаліма і яго рэгіёну».

Да такой высновы можна прыйсці, зыходзячы з некалькіх фактаў. Напрыклад, у Евангеллі ад Лукі гаворыцца: Эмаўс знаходзіцца «ў 60 стадыях» ад Ерусаліма, што роўна прыкладна 13 кіламетрам. Дакладна такая ж адлегласць паміж паселішчам Кірыяф-Іярым і Ерусалімам.

Акрамя таго, нядаўнія раскопкі ў Кірыяф-Іярыме дазволілі знайсці шэраг умацаванняў, збудаваных у першай палове другога стагоддзя да нашай эры. Мяркуюць, што імперыя, якая кантралявала рэгіён у той час, у тым ліку ўмацоўвала і Эмаўс.

Яшчэ адно магчымае пацвярджэнне: знойдзеныя ў Кірыяф-Іярыме керамічныя вырабы паказваюць, што гэтая мясцовасць магла быць заселеная людзьмі прыкладна ў той жа час, калі і адбываліся апісаныя вышэй біблейскія падзеі.

Зрэшты, дакладна сцвярджаць, што Кірыяф-Іярым з'яўляецца Эмаўсам, нельга. Напрыклад, даследчыкі сцвярджаюць: паміж назвамі Кірыяф-Іярым і Эмаўс не існуе моўнай сувязі. Акрамя таго, паводле некаторых звестак Эмаўс знаходзіўся ў «30 стадыях» ад горада, а не 60.