Выбары ў Ізраілі: Нетаньяху, Ганц і Ліберман апынуліся ў стане «мексіканскай нічыі»

Сітуацыя, у якой апынуліся палітыкі, патрабуе ад іх прымання нечаканых пастановаў.

Новая-старая патавая сітуацыя, у якой знаходзіцца ізраільская палітычная сістэма, прымушае нас увесці ў мясцовы палітычны слэнг новае паняцце: Ганц і Нетаньяху знаходзяцца ў стане "мексіканскага супрацьстаяння", піша палітолаг Моран Азулай у артыкуле на сайце vesty.co.il.

Гэтае паняцце ў амерыканскім слэнгу пазначае сітуацыю, калі тры спаборнікі стаяць адзін супраць аднаго з узведзенымі пісталетамі.

У адрозненне ад дуэлі, дзе першы стралок мае перавагу, тут прынцып заключаецца ў неабходнасці дзейнічаць паводле прынцыпу "хто першы міргне". І сапраўды: калі першы ўдзельнік стрэліць у другога, то трэці паспее стрэліць у першага і такім чынам пераможа. Такім чынам, ключавым момантам пры роўных сілах спаборнікаў у мексіканскім супрацьстаянні можа з'яўляцца немагчымасць прасоўвання сваіх інтарэсаў з мэтай захавання балансу.

Гэта сапраўды патавая сітуацыя. Ганц і Нетаньяху (і, калі хочаце, то і Ліберман у якасці трэцяга партнёра) з аднаго боку – пагражаюць адзін аднаму, а з другога – паралізуюць дзеянні праціўніка.

Сапраўды гэтаксама, як і на мінулых выбарах, ні адзін з кандыдатаў не ў стане стварыць урад, але можа прадухіліць магчымасць ягонага стварэнне для свайго праціўніка. Гэтая складаная сітуацыя, калі куркі ўзведзеныя і пісталеты могуць стрэліць у любую хвіліну, мае два варыянты развязання. Альбо паміж спаборнікамі складваецца ўзаемны давер і яны могуць дамовіцца апусціць пісталеты разам, альбо – страляюць усе, прычым адначасова. І тады нас чакае трэці раўнд выбараў.

Сітуацыя, у якой апынуўся Біньямін Нетаньяху, асабліва складаная. Міністры Лікуда, якія знаходзіліся з ім у кантакце цягам усяго дня выбараў, апавядаюць, у якім няпростым душэўным стане ён знаходзіўся. Цяжкія пачуцці ўзмацніліся ў вечаровыя гадзіны, калі пачалі паступаць першыя звесткі з выбарчых участкаў Гуш-Дана. Усё сведчыла, што выбарнікі Кахоль-Лаван на гэты раз надумалі выявіць актыўнасць і грамадзянскую пазіцыю і выйшлі галасаваць. Ажыўленае галасаванне ў арабскім сектары таксама не выклікала аптымізму ў лідараў кіроўнай партыі.

Прадаўжаючы аналогіі з Дзікім Захадам, Нетаньяху прыйшоў на выбары без амуніцыі, уся цяжкая артылерыя была ўжо запушчаная ў ход, козыраў у ягоных рукавах не засталося. Ягоныя традыцыйныя прыхільнікі засталіся абыякавыя да ягоных заклікаў, затое ў процілеглым лагеры зразумелі, што можна палепшыць сітуацыю, хоць трохі.

Такім чынам, і цяпер незразумела, як будзе выглядаць наступны ўрад, калі ён увогуле будзе створаны ў найбліжэйшыя тыдні. Сюрпрыз-акцёр цяперашніх выбараў – Авігдор Ліберман – зноў вызначае правілы гульні. Ён заклікаў прэзідэнта прымусіць абодвух кандыдатаў пайсці на стварэнне ўрада нацыянальнага адзінства яшчэ да публікацыі канчатковых вынікаў. Сёння раніцай ён яшчэ раз паўтарыў свае ўмовы для далучэння да ўрада. Да ягоных патрабаванняў трэба прыслухацца. У мінулы раз, калі лідар НДІ агучыў свае ўмовы – да іх не паставіліся сур'ёзна. Як высвятляецца цяпер – дарма.

Каб развязаць праблему "мексіканскага супрацьстаяння" з ізраільскім акцэнтам, хто-небудзь з яго ўдзельнікаў павінен парушыць сваё слова. Пасля таго, як Ганц абяцаў зноў і зноў, што не ўвойдзе ні ў адзін урад з Нетаньяху з ягонымі абвінаваўчымі высновамі – магчыма, цяпер ягоныя патрабаванні зменяцца. Ці Лікуду давядзецца расстацца са сваім лідарам, чаго там таксама абяцалі не рабіць. Усё гэта – на фоне блізкіх слуханняў у юрыдычнага дарадцы, якія адбудуцца ў пачатку кастрычніка.

Сёння здаецца, што ўпершыню за апошнія 10 гадоў Нетаньяху страціў правую большасць у кнэсеце. І гэта ставіць яго супраць двух не вельмі прыемных для яго варыянтаў: ратацыя з Ганцам (у найлепшым выпадку) ці ўжо сыход з палітычнага жыцця (у менш удалым варыянце). У любым выпадку – усе пастановы на гэты момант знаходзяцца ў руках у прэзідэнта Рыўліна.