Фотафакт: Ураджэнка Гомеля з пікетам каля адміністрацыі Пуціна
2- 18.09.2019, 17:42
- 11,454
Аляксандра Борціч падтрымала Паўла Усцінава.
Актрыса Аляксандра Борціч выйшла ў цэнтр Масквы з плакатам у падтрымку калегі - Паўла Усцінава, якога адправілі за краты на 3,5 гады пасля затрымання на акцыі пратэсту 3 жніўня, піша «Салiдарнасць».
Так беларуска далучылася да флэшмобу, удзельнікі якога заклікаюць улады вызваліць фігуранта «маскоўскай справы». Дзясяткі вядомых актораў напісалі на гэтую тэму ў сацсетках, а таксама надрукавалі відэазвароты да ўладаў. У тым ліку Юлія Перасільд, Аляксандр Паль, Яўген Цыганаў, Павел Дзеравянка, Аляксандр Стычкін.
Аляксандра Борціч, у сваю чаргу, 18 верасня выйшла на адзіночны пікет да Адміністрацыі прэзідэнта РФ з плакатам «Я-Мы ўся краіна».
Усяго ж у акцыі ўзялі ўдзел сотні чалавек. Ахвотныя падтрымаць Усцінава стаялі ў чарзе, каб адзінкавым пікетам выказаць сваё абурэнне з нагоды прысуду.
Большасць тых, хто прыйшоў - акторы, рэжысёры, драматургі.
Ураджэнка Гомеля даўно перабралася ў Расею, дзе будуе паспяховую акторскую кар'еру. У 2016-м яна паўстала перад гледачамі ў вобразе Рагнеды, у 2017-м паправілася на 20 кг дзеля ролі ў фільме «Я худнею», а ў 2018-м вярнулася ў ранейшую форму. Летась Борціч стала «Жанчынай года» паводле версіі часопіса Glamour.