«Усе павінны здаваць мабільныя да канца ўрокаў»

Пасля скандалу ў Гомелі правілы ў школах робяць больш жорсткімі?

Сёння заняткі ў некаторых менскіх школах пачаліся з інфармацыйнай гадзіны, на якім паведамілі: цяпер фота - і відэаздымка ў установах адукацыі забароненая, мабільны тэлефон вучні будуць здаваць у пачатку дня класнаму кіраўніку — і кожнаму дзіцяці гэта патрабаванне даводзяць пад подпіс, піша tut.by.

Школьнікі забарону звязваюць з гомельскай гісторыяй, дзе дзеці знялі настаўніка на відэа і выклалі ў інтэрнэт. У Мінадукацыі адказалі: забарона на тэлефоны з'явілася яшчэ ў сакавіку, але, маўляў, не ўсе яе выконвалі.

- Сёння раніцай патэлефанавала дзіця са школы і сказала, усе класы, з 1-га да 11-га, цяпер павінны будуць здаваць мабільныя тэлефоны настаўніку, вернуць іх толькі пасля заканчэння ўсіх урокаў — распавядае Наталля, мама менскага школьніка. - Усім дзецям далі распісацца, што яны азнаёмленыя з гэтай пастановай. Але хіба гэта законна? Дзеці ж непаўналетнія! Са мной, законным прадстаўніком, ніхто не звязваўся, напярэдадні быў бацькоўскі сход, аб навіне не было сказана ні слова. Школьнікі абмяркоўваюць, што гэта звязанае з гісторыяй у Гомелі, хоць проста пра гэта педагогі не гавораць.

Адразу некалькі бацькоў паведамілі пра тое, што сённяшні навучальны дзень у школах пачаўся з забароны мабільных тэлефонаў. Кожная ўстанова вызначае для сябе, якім чынам школьніка абмяжоўваць: адны забіраюць тэлефоны толькі на ўроках, іншыя - проста перад першым урокам і аддаюць толькі пасля заняткаў. У дакуменце, які павінны падпісаць дзеці, пазначана: тэлефонам можна карыстацца толькі ў экстраным выпадку, у астатні час ён знаходзіцца ў класнага кіраўніка.

— У нас сёння ў школе была гадзіна інфармавання. Дзяцей сабралі ў актавай зале, разабралі з імі гомельскі скандал. Са слоў дзіцяці, ім сказалі, што трэба паводзіць сябе добра, бо калі будуць паводзіць сябе дрэнна, то настаўнік сарвецца, і настаўніку цяпер за гэта нічога не будзе. Акрамя таго, дзецям паведамілі, што фота - і відэаздымка ў сценах школы забароненая, а калі падчас урокаў убачаць мабільны тэлефон, то яго адбяруць, - распавядае мянчанка Вольга.

Тэму мабільных тэлефонаў у школах сёння падчас нарады ў эканоміцы закрануў дыктатар.

«Вы што, чакаеце яшчэ, каб як у Стоўбцах у нас адбылося? А пачынаецца адсюль — са здзеку з настаўніцы. І яшчэ на камеру здымаюць і выкладваюць у сетку. І гэта ў чацвёртым класе...у тэлефонах сядзяць там...няўжо вы не разумееце, у вас жа свае дзеці, што тэлефон і іншыя гаджэты ў школе — гэта не толькі адцягненне ад заняткаў. Яны перастаюць думаць. Яны ж лічыць не ўмеюць, табліцу множання не ведаюць, бо адкрываюць тэлефон і перамнажаюць там. Або шукаюць адказы на пытанні. Няўжо гэта нельга зразумець? У мяне сын прэзідэнта ні разу тэлефон у школу не ўзяў», - выказаўся Лукашэнка.

У Міністэрстве адукацыі распавялі, што загад «аб захадах, накіраваных на ўдасканаленне дзейнасці ў гарантаванні бяспечных умоў знаходжання навучэнцаў ва ўстановах агульнай сярэдняй адукацыі быў выдадзены» яшчэ ў сакавіку 2019 года.

- Тэлефоны былі забароненыя яшчэ тады, але не ўсе выконваюць загад, не выконваюць патрабаванні — кажа Людміла Высоцкая, прэс-сакратарка Міністэрства адукацыі. - Перад пачаткам урока дзеці павінны пакідаць тэлефоны ў скрынках, але, калі гэта неабходна для навучальнага працэсу, могуць скарыстацца.

Паводле яе слоў, кожная навучальная ўстанова самастойна вызначае, якім чынам у дзяцей будуць забіраць мабільныя тэлефоны. Пра тое, што дзеці павінны нешта падпісваць у школе, Людміла Высоцкая чуе ўпершыню.

— У гэтым выпадку школьнікі падпісваюць, што азнаёмленыя з правіламі ўнутранага распарадку, не бачу ў гэтым парушэння. Да школьнікаў проста даводзяць інфармацыю аб забароне выкарыстання мабільнага тэлефона — каментуе адвакат Сяргей Буякевіч. - Як бацька, я за тое, каб дзеці вучыліся без якіх-небудзь гаджэтаў, і не таму, што хтосьці вядзе здымку, - тэлефоны рэальна перашкаджаюць вучыцца. Ведаю дакладна, у многіх краінах, напрыклад, Швайцарыі і Нарвегіі, дзеці прыходзяць у школу ці гімназію, здаюць гаджэты пры ўваходзе і забіраюць пасля ўрокаў.