ЦВК Ізраіля абвесціў вынікі выбараў у Кнэсет

Партыя Нетаньяху – на другім месцы.

Цэнтральная выбарчая камісія Ізраіля ў ноч на 20 верасня апублікавала "практычна канчатковыя" вынікі выбараў у Кнэсет. Пра гэта паведамляе 9 канал.

Вынікі не ўключаюць галасы з 14 праблемных выбарчых участкаў, дзе былі заўважаныя парушэнні. Цяпер паводле іх вядзецца праверка. Тэлеканал адзначае, што падлік рэшты галасоў істотна не зменіць палітычны расклад.

Паводле звестак ЦВК Ізраіля, больш за ўсё галасоў на выбарах набраў левацэнтрысцкі блок "Кахоль-лаван", які апярэдзіў партыю прэм'ер-міністра краіны Біньяміна Нетаньяху "Лікуд".

Так, "Кахоль-лаван" атрымлівае 33 мандаты, "Лікуд" – 31, Аб'яднаны арабскі спіс – 13, партыя "Наш дом Ізраіль" былога міністра абароны Авігдора Лібермана атрымала восем мандатаў.

Афіцыйныя вынікі выбараў будуць апублікаваныя і пададзеныя прэзідэнту Ізраіля Рэўвену Рыўліну 25 верасня.

Паводле звестак "9 канала", прэзідэнт 22 верасня пачне кансультацыі з прадстаўнікамі парламенцкіх фракцый, каб даведацца, каго парэкамендуе кожная фракцыя ў якасці наступнага кіраўніка ўрада.

Калі 61 дэпутат выступіць на карысць аднаго кандыдата, яму даручаць пачаць кааліцыйныя перамовы. Тэлеканал адзначае, што гэты кандыдат не абавязкова павінен быць лідарам партыі. Калі 61 дэпутата на карысць таго ці іншага кандыдата не знойдзецца, пасля заканчэння кансультацый прэзідэнт самастойна прыме пастанову і назаве імя палітыка з ліку дэпутатаў, у якога, на ягоную думку, найбольш высокія шанцы на фармаванне кааліцыі.

Папярэднія парламенцкія выбары ў Ізраілі прайшлі 9 красавіка. "Лікуд" і апазіцыйны "Кахоль-лаван" атрымалі роўную колькасць дэпутацкіх месцаў – 35 кожны. Аднак разам з партнёрамі ў правым крыле "Лікуд" атрымаў большасць і права фармаваць кааліцыю. Перамовы сталі безвыніковымі.