Школьнікі без мабільнікаў: На ўваходзе ў нашу сталоўку можна сустрэць вусатага!
82- 21.09.2019, 13:41
- 59,399
Як у беларускіх школах выконваюць загад Лукашэнкі.
Ужо з дзясяткаў школаў Беларусі нам пішуць, што пасля гісторыі ў Гомелі педагогі заўзята кінуліся выконваць загад дыктатара пра "навядзенне парадку". А менавіта – адбіраць у школьнікаў мабільныя тэлефоны проста на ўваходзе: каб педагогаў, якія лаюцца матам, хамяць, займаюцца грашовымі паборамі і праўладнай агітацыяй, не здымалі на відэа і не публікавалі на YouTube, піша тэлеграм-канал NEXTA Lite.
Пры гэтым дзяцей адразу папярэджваюць, што "за захаванасць здадзеных на захоўванне тэлефонаў" (іхні кошт часам складае 2-3 убогія педагогавы заробкі) "школа адказнасці не нясе".
Ёсць і асаблівыя выпадкі.
– Проста на ўваходзе ў нашу сталоўку можна сустрэць вусатага! – пішуць нам вучні сярэдняй школы №61 горада Менска. – І гэта зусім не так званы "прэзідэнт", а іншая шкодная кузурка: укормлены прусак. Іх тут сотні. Менавіта для таго, каб іх і іншае школьнае бязмежжа не здымалі, у нас адбіраюць тэлефоны.
Самі школьнікі ўжо знайшлі сродак супраць калгаснага маразму: "на захоўванне" здаюць старыя тэлефоны, а новыя – праносяць. Так што чакайце свежых сенсацый.