Алег Сянцоў паглядзеў серыял «Чарнобыль»: уражанні рэжысёра

Ступень мастацкай і гістарычнай праўдзівасці серыяла ўразіла экспэрта.

Былы палітычны вязень Алег Сянцоў паглядзеў міні-серыял «Чарнобыль» ад кампаніі HBO, які стаў самым рэйтынгавым паводле версіі IMDb. На думку ўкраінскага рэжысёра, кінапраца з'яўляецца вельмі добрай.

Пра гэта Алег Сянцоў напісаў на сваёй старонцы ў Facebook, паведамляе 24tv.ua. Ён дадаў, што не можа назваць «Чарнобыль» серыялам, хутчэй - шматсерыйным фільмам.

Былога палітычнага вязня дзівіць ступень праўдзівасці не толькі ў мастацкай і гістарычнай рэканструкцыі савецкага побыту, але і ў спосабе мыслення і дзеяннях.

«Нават твары ў актораў усе нейкія з таго часу. Другое, што радуе - гэта манера здымкі, больш уласцівая аўтарскаму кіно, якое нібыта мала хто глядзіць. Выяўляецца, што глядзяць і разумеюць многія людзі ва ўсім свеце», - адзначыў рэжысёр.

Алег Сянцоў дадаў, што ёсць дробныя недахопы і недакладнасці, але яны не замінаюць галоўнаму - «уплыву на цябе гэтага фільма, які зняты праўдзіва і старанна».

І нават нягледзячы на галоўную неадпаведнасць, як для мяне: сцэну суда ў апошняй серыі, якая больш нагадвае амерыканскае, а не саўковае правасуддзе, кіно мне вельмі спадабалася. Магчыма я стаўся адным з апошніх яго гледачоў, але дакладна ўдзячным, падкрэсліў Сянцоў.

Нагадаем, 10 траўня 2014 года Алега Сянцова з актывістам Аляксандрам Кольчанкам арыштавалі ў акупаваным Крыме. Акупанты абвінавацілі рэжысёра і актывіста ў падрыхтоўцы тэрактаў. Ужо праз год Сянцова прысудзілі да 20 гадоў расейскай калоніі строгага рэжыму, а Кольчанку далі 10 гадоў. У 2018 годзе Сянцоў абвясціў галадоўку з патрабаваннем вызваліць усіх палітвязняў Крамля.

7 верасня 2019 года ў рамках абмену палоннымі Алега Сянцова, Аляксандра Кольчанку і яшчэ 33 украінскіх палонных Крамля вызвалілі з палону.