Вайсковыя начальнікі з Беларусі па чарзе наведаліся ў Азербайджан і Арменію

Што адбываецца?

Дзяржаўны сакратар Савета бяспекі Беларусі Станіслаў Зась сустрэўся з міністрам абароны Азербайджана Закір Гасанавым. Пра гэта паведамляе прэс-служба Міністэрства абароны Азербайджана, паведамляе tut.by.

Бакі падкрэслілі, што высокі ўзровень сувязяў паміж краінамі і сяброўскія адносіны кіраўнікоў дзяржаў ствараюць трывалую аснову для развіцця двухбаковага супрацоўніцтва і рэгіянальнай бяспекі.

Зась і Гасанаў адзначылі вялікі патэнцыял для рэалізацыі сумесных праектаў у розных напрамках, між іншым, у вайсковай, вайскова-тэхнічнай і вайскова-адукацыйнай сферах.

На сустрэчы Станіслаў Зась звярнуў увагу на наяўнасць перспектыў для пашырэння вайсковага супрацоўніцтва паміж Беларуссю і Азербайджанам.

Падчас візіту ў Азербайджан кіраўнік Савета бяспекі таксама сустрэўся з прэзідэнтам краіны Ільхамам Аліевым, кіраўніком адміністрацыі прэзідэнта Раміза Мехтыевым, сакратаром Савета бяспекі Азербайджана Раміль Усубавым.

Варта нагадаць, што Беларусь і Азербайджан ужо даўно супрацоўнічаюць у розных напрамках, у тым ліку ў пастаўках вайсковай тэхнікі. У 2018 годзе ў Баку былі пастаўлены беларускія ракетныя сістэмы залпавага агню «Паланэз». Вайсковыя аналітыкі разглядалі гэты кантракт як «некалькі запознены адказ Азербайджана на пастаўкі Расеяй комплексаў «Іскандэр» у Арменію».

У Арменіі не разумелі продаж Менскам «Паланэз» Баку. Арменія і Беларусь з'яўляюцца ўдзельнікамі АДКБ, у адрозненне ад Азербайджана. Згодна з умовамі дамовы, пры агрэсіі ў адносінах да адной з краін іншыя ўдзельнікі АДКБ павінны стаць на яе абарону. У Ерэване лічаць вельмі верагоднай пагрозу з боку Баку на фоне нагорна-карабахскага канфлікту.

Характэрна, што ў гэтыя дні начальнік генштаба Узброеных сіл Беларусі, першы намеснік міністра абароны генерал-маёр Алег Белаконеў наведвае Арменію.

Падчас візіту, які працягнецца да 24 верасня, праведзеныя двухбаковыя перамовы з кіраўніцтвам УС Арменіі. Бакі абмеркавалі пытанні стану і перспектыў двухбаковага вайсковага супрацоўніцтва, узаемадзеяння ў рамках міжнародных арганізацый АДКБ і СНД, якія маюць быць на сумесных мерапрыемствах аператыўнай і баявой падрыхтоўкі ўзброеных сіл Беларусі і Арменіі. Таксама адбыўся абмен думкамі адносна вайскова-палітычнага становішча ў рэгіёне і свеце, паведамляе Міністэрства абароны Беларусі.

Акрамя таго, кіраўнік беларускай вайсковай дэлегацыі сустрэнецца з ветэранамі Вялікай Айчыннай вайны 1941-1945 гг., якія пастаянна пражываюць на тэрыторыі Арменіі.