Нямеччына далучылася да альянсу краін, свабодных ад вугальнай энэргетыкі

У Бэрліне гэты крок назвалі магутным сігналам усяму свету.

Нямеччына далучыцца да альянсу краін, якія выступаюць за адмову ад выкарыстання вугалю для выпрацоўкі электраэнэргіі (Powering Past Coal Alliance). Пра гэта міністарка аховы навакольнага асяроддзя і ядзернай бяспекі ФРГ Свен’я Шульцэ (Svenja Schulze) паведаміла ў інтэрв'ю выданням медыягрупы Funke, апублікаваным у нядзелю, 22 верасня. Са слоў палітыка, афіцыйную заяву пра гэта яна зробіць на саміце абароны клімату ў Нью-Ёрку, які праходзіць 22 верасня, паведамляе dw.com.

«Адмова ад выкарыстання вугалю - гэта адзін з ключавых кампанентаў для глабальнай абароны клімату», - цытуе Шульцэ нямецкая газета Hamburger Abendblatt. Выпрацоўка электраэнэргіі, заснаваная на выкарыстанні вугалю, у самых розных частках свету становіцца «ўжо мадэллю, якая адслужыла сваё», дадала яна.

Са слоў Шульцэ, калі такая вялікая прамысловая краіна, як Нямеччына, адмовіцца ад вугалю і атамнай энэргіі і паступова цалкам пераарыентуе сістэму энэргазабеспячэння на аднаўляльныя крыніцы энэргіі, гэта стане «магутным сігналам» для іншых рэгіёнаў свету.

Да 2038 года - поўная адмова ад вугалю

У чэрвені 2018 года ўрад ФРГ стварыў камісію пад назвай «Рост, структурныя змены і занятасць», у якую ўвайшлі прадстаўнікі бізнэсу, прафсаюзаў, уладаў вуглездабыўных рэгіёнаў, экалагічных арганізацый і навуковых колаў.

Больш за паўгода яны сумесна распрацоўвалі канцэпцыю таго, як Нямеччына, выконваючы ўзятыя на сябе міжнародныя абавязанні ў абароне клімату і скарачэнні выкідаў парніковых газаў, магла б спыніць выкарыстанне вугалю, не наносячы пры гэтым шкоды эканоміцы краіны, энэргетычным кампаніям і канкрэтным рэгіёнам. 26 студзеня 2019 года камісія ўзгадніла і апублікавала дакумент, які прадугледжвае поўную адмову ад выкарыстання бурага вугалю ў электраэнэргетыцы Нямеччыны не пазней за 2038 год. Здабыча каменнага вугалю на тэрыторыі Нямеччыны была канчаткова завершаная ў снежні 2018 года, калі ў Рурскай вобласці зачынілася апошняя вугальная шахта.

Калі быў створаны альянс краін, якія адмаўляюцца ад вугальнай энэргетыкі?

Пра стварэнне альянсу краін, якія выступаюць за адмову ад выкарыстання вугалю для выпрацоўкі электраэнэргіі, было абвешчана на Канферэнцыі ААН у змене клімату, якая праходзіла ў Боне ў лістападзе 2017 года.

На сённяшні дзень да гэтага альянсу далучыліся 30 краін. У той жа час, паводле звестак інфармагенцтва AFP, больш за 80 урадаў асобных краін і рэгіёнаў, а таксама розных прадпрыемстваў падтрымліваюць адмову ад будаўніцтва новых вугальных электрастанцый і міжнароднага фінансавання развіцця вугальнай прамысловасці і выступаюць за тое, каб вызначыцца з датай канчатковай адмовы ад выкарыстання вугальнай энэргіі прывесці нацыянальныя меры па ахове навакольнага асяроддзя ў адпаведнасць з палажэннямі Парыжскага пагаднення па абароне клімату.

У пятніцу, 20 верасня, урад Нямеччыны пасля доўгіх дыскусій узгадніў пакет мер, накіраваных на абарону клімату. Апроч іншага, ён мае на ўвазе буйныя інвестыцыі ў гэтую сферу, увядзенне нацыянальнай сістэмы гандлю эмісійнымі квотамі ў транспартнай і будаўнічай галінах, а таксама скліканне экспэртнай рады, што закліканая штогод правяраць вынікі працы па абароне клімату.