У Малдове назвалі ключавога бенефіцыяра крадзяжу мільярда

Ён пакінуў Малдову і хаваецца за мяжой.

Ключавым бенефіцыярам крадзяжу мільярда з банкаў Малдовы ў 2015 годзе з'яўляецца былы лідар Дэмакратычнай партыі Улад Плахатнюк.

Пра гэта заявіў старшыня следчай камісіі для высвятлення абставінаў дэвальвацыі банкаўскай сістэмы краіны і расследавання банкаўскага махлярства Аляксандр Слусар, паведамляе "Еўрапейская праўда" са спасылкай на Ziarul de Gardă.

Расследаваннем сітуацыі пастановай Нацыянальнага банка Малдовы ў 2015 годзе займаецца міжнародная кампанія Kroll.

Слусар сцвярджае, што атрымаў 20 верасня частку спісу з імёнамі асобаў, якія ўключаныя ў справаздачу Kroll.

У спісе, кажа ён, у якасці бенефіцыяраў, акрамя Плахатнюка, таксама фігуруюць былы прэм'ер-міністр Улад Філат і былы мэр Арэгеева Ілан Шор, старшыня партыі "Шор".

"У дакуменце напісана, што Улад Плахатнюк і ягоныя кампаніі з'яўляюцца асноўным бенефіцыярам ад крадзяжу. Потым ідзе група Улада Філата. Сумы, якія яны атрымалі, таксама ўказаныя. Таксама тут імёны Ілана Шора, Ілоны Шор, Марыны Таўбер, Рэгіны Апосталавай, Вадзіма Фацеску, Габрыэля Стаці. Таксама ў дакуменце фігуруюць даччыныя кампаніі Плахатнюка. Імя Вольгі Бандарчук сустракаецца вельмі часта, ёсць сувязі як з Плахатнюком, так і з Шорам", – паведаміў Слусар.

Паводле словаў Слусара, у спісе фігуруюць таксама некалькі імёнаў, менш вядомых у публічнай прасторы.

"Некаторыя з прозвішчаў, якія з'яўляюцца тут, часткова вядомыя, часткова не. Ёсць некалькі падазроных імёнаў. У дакуменце фігуруе не толькі імя Плахатнюка", – заявіў Слусар.

Старшыня следчай камісіі сцвярджае, што ў спісе, які ён атрымаў, не фігуруе імя мужа спікеркі парламента Зінаіды Грачанай.

"У дакументах, якія мы атрымалі, не фігуруе муж Зінаіды Грачанай. Мы збіраемся прааналізаваць іх усе, і тады паглядзім, але мы не ўбачылі ягонага імя тут", – сказаў Слусар.

Да 15 кастрычніка справаздача Камісіі пра расследаванне махлярства ў банкаўскай сістэме будзе гатовая. Адно з патрабаванняў, з якімі могуць сутыкнуцца сябры камісіі, – гэта рассакрэчванне ўсіх матэрыялаў у гэтай справе, кажа старшыня камісіі расследавання Аляксандр Слусар.

Нагадаем, у 2015 годзе ў Малдове стала вядома, што з трох банкаў – Banca de Economii, Banca Sociala і Unibank, якія кантралявалі амаль палову рынку банкаўскіх паслуг, было выведзена за мяжу блізу мільярда даляраў.

Плахатнюк і Шор пакінулі Малдову і хаваюцца за мяжой.