Памежнікі ў Паставах атрымалі апёкі і пераломы падчас рамонту службовага аўто

Падчас зваркі выбухнула паліва.

Двое вайскоўцаў камендатуры «Паставы» пацярпелі пры пажары, які ўзнік праз парушэнні тэхнікі бяспекі пры рамонце службовай тэхнікі. Пра гэта паведамляе Смаргонская памежная група.

21 верасня прапаршчык і жаўнер тэрміновай службы рамантавалі ў гаражы службовую машыну. Старэйшы па званні займаўся зваркай і парушыў тэхніку бяспекі, праз што загарэліся пары паліва, адзначае Смаргонская памежная група.

Пры пажары пацярпелі два супрацоўнікі камендатуры «Паставы». Жаўнер тэрміновай службы атрымаў апёкі 1-2 ступені на адкрытых участках цела, рану і ўдары на нагах. У прапаршчыка - такія ж апёкі, пералом рукі і страсенне мозгу лёгкай ступені.

Пажар патушылі мясцовыя ратавальнікі. Пацярпелыя ў лякарні. Пагрозы жыццям вайскоўцаў няма.

Камандаванне памежнай групы праводзіць разбор.

Тэлеграм-канал NEXTA апублікаваў фота з месца здарэння. Ён паведамляе, што вайскоўцы заварвалі «цечу ў бензабаку службовага аўтамабіля проста ў прыватным гаражы прапаршчыка». «Гараж цалкам знішчаны, дасталася і аўтамабілю», дапаўняе тэлеграм-канал.