Домрачава распавяла, чаму не змяніла прозвішча на Б'ёрндален

Чатырохкратная алімпійская чэмпіёнка распавяла, чым займаецца пасля заканчэння кар'еры.

Чатырохкратная алімпійская чэмпіёнка Дар'я Домрачава распавяла ў інтэрв'ю былому фігурысту, а цяпер вядоўцу «Матча ТБ» Аляксею Ягудзіну, чым займаецца пасля заканчэння кар'еры, піша sport.tut.by.

Пра жыццё пасля спорту

Жыццё прадаўжае быць насычаным. Сумую аб напале эмоцый, але ў той жа час атрымліваю асалоду ад цяперашняга стану. Наогул, шмат у каго са спартоўцаў пасля заканчэння кар'еры бывае настальгія па пераездах. Усё ж за гэтыя гады яны ўваходзяць у звычку. Для мяне такога не было, бо ў нас інтэрнацыянальная сям'я. Мы таксама вельмі шмат падарожнічаем. Стараемся падладжвацца пад планы адзін аднаго. Самая вялікая розніца ў тым, што калі ты спартовец, то жывеш паводле выразнага графіку. А цяпер усё адбываецца больш сумбурна.

Пра лінію адзення

Буціка пакуль няма. У нас інтэрнэт-крама. Цяпер мы канцэнтруемся на продажы нашай спартыўнай экіпіроўкі менавіта онлайн. Але часам выходзім і ў офлайн-рэжым, удзельнічаем у розных мерапрыемствах. Калі я была дзейнай спартоўкай, то для мяне гэта было больш хобі. А цяпер я ўспрымаю сваю лінію экіпіроўкі як справа, якой я хачу займацца і ў будучыні.

Пра Менск, Нарвегію і Манака

Складана сказаць, дзе мы больш за ўсё часу праводзім. Напэўна, у пераездах і падарожжах. Жывем і ў Менску, бліжэй да зімовага сезону часцей бываем у Нарвегіі. Манака? Нейкі перыяд, магчыма, пажывём і там.

Трохі пра Маскву

Мяне Масква, вядома ж, не труціць. Гэтае слова можна ў двукоссі паставіць. Проста спаборніцтвы звычайна праходзяць у лесе, трэніроўкі там жа. Шмат свежага паветра вакол. А калі ты трапляеш у мегаполіс, то здараецца шок з арганізмам. Тут і загазаванасць, і ўзровень шуму, і колькасць транспарту. Масква - выдатны горад, і я вельмі люблю там бываць. Але такія моманты, пра якія я казала, адбіваліся на маім стане.

Пра галоўнае ў сям'і

Са з'яўленнем нашай дачкі Ксеніі яна, вядома ж, стала галоўнай у сям'і. А так мы стараемся прыслухоўвацца адзін да аднаго. Уле мае нейкія планы ў Нарвегіі, я - тут. Мы спрабуем суадносіць свае планы, каб абодвум было зручна. Калі трэба нейкая пастанова, то прымаем яе на сямейнай радзе.

Чаму Дар'я - Домрачава, а не Б'ёрндален

Наша вяселле адбылося, калі я яшчэ была дзейнай спартоўкай. Для мяне змена прозвішча тады была неактуальная. Не ведаю, можа, у будучыні гэта яшчэ і зменіцца.