Як просты фермер на трактары кінуў выклік Лукашэнку
15- 23.09.2019, 8:51
- 44,412
Фермер з Гомельскай вобласці выкрывае аграрную палітыку ўладаў.
Такога «кандыдата» яшчэ не было: Юры Гацэвіч вылучаецца на «выбары» ў «палату прадстаўнікоў» у гомельскай Чыгуначнай акрузе – і прыязджае на пікет на трактары, паведамляе «Белсат».
Фермер гаворыць, што пастанавіў ісці ў палітыку праз несправядлівасць дзяржавы.
«Лукашэнка паўсюль гаворыць і выступае на тэлевізіі: развівайце сельскую гаспадарку, развівайце аграсядзібы. Выдае для гэтага ўказы, але яны не працуюць. Гэта значыць, яны гэтымі ўказамі дураць галаву нам», – заяўляе Гацэвіч.
Сярод прапановаў патэнцыйнага «кандыдата» – упарадкаванне заканадаўства, якое дазволіла б лягчэй існаваць малому бізнэсу, у першую чаргу – тым, хто працуе на зямлі.
«Купі карову – няма дзе яе пасвіць. Забралі ўсе землі і перадалі калгасам», – кажа фермер.
Юры Гацэвіч з вёскі Пакалюбічы стаў вядомы пасля таго, як у сеціве з'явіўся ролік: на відэа фермер эмацыйна апавядае супрацоўніку ДАІ, што на ім зарэгістравана цэлых дзевяць транспартных сродкаў, і за кожны – трэба плаціць велізарны дарожны збор.
На канале фермера на «YouTube» гэты ролік прагледзелі больш за 250 тысячаў чалавек. Большасць каментатараў падтрымала Юрыя, нязгоднага з такой сістэмай аплаты дарожнага збору. Некаторыя прыйшлі падтрымаць фермера і сёння, ужо не віртуальна.
Вось што сказалі ў каментары «Белсату» жыхары Гомеля:
«З роліка даведаліся пра ягоную пазіцыю. Грамадзянскую. Правільную, як мне здаецца».
«Чалавек працуе, добрасумленна. Значыць, трэба за яго галасаваць, падтрымліваць яго».
«Калі “кандыдат” незалежны, на ўладу не арыентуецца, то чаму б не?»
«“Выбары” ўжо даўно прайшлі ў адміністрацыі Лукашэнкі. Засталося “галасаванне” нікому не патрэбнае».