Навукоўцы знайшлі ў дыяменце таямнічы мінерал з мантыі Зямлі
- 24.09.2019, 11:57
- 10,445
Ён ніколі раней не сустракаўся на нашай планеце.
Таямнічы мінерал з мантыі Зямлі знойдзены ў паўднёваафрыканскім дыяменце.
З дапамогай шэрагу аналізаў навукоўцы вызначылі, што мінерал сфармаваўся за 170 кіламэтраў пад паверхняй Зямлі, піша glas.ru.
Крупінка каменя, якая патрапіла ў дыямент, змяшчае ніколі раней не сустраканы на Зямлі мінерал. Ён можа дапамагчы выявіць незвычайныя хімічныя рэакцыі, што разгортваюцца ў глыбінях мантыі, пласта Зямлі, які ляжыць паміж карой планеты і вонкавым ядром.
Навукоўцы адкапалі мінерал на вулканічнай дзялянцы ў Паўднёвай Афрыцы, вядомай як труба Кофіфантэйна. Бліскучымі дыяментамі засеяныя цёмныя магматычныя пароды, якія ўтвараюць лінію трубы, а самі дыяменты змяшчаюць малюсенькія кавалачкі іншых мінералаў, якія знаходзяцца на глыбіні сотні кіламэтраў пад паверхняй Зямлі. У адным з гэтых бліскучых камянёў навукоўцы выявілі цёмна-зялёны непразрысты мінерал.
Пароды паглынаюць іншыя мінералы мантыі ў сваіх структурах і могуць быць выціснутыя на паверхню планеты падземнымі вулканічнымі выкідамі. Аналізуючы мінеральныя ўключэнні ў дыяментах, навукоўцы могуць азнаёміцца з хімічнымі працэсамі, якія адбываюцца далёка пад зямной карой.
Аўтары даследавання адзначылі, што мантыйны мінерал гольдшмідыт мае асаблівы хімічны склад. Ён змяшчае высокія канцэнтрацыі ніёбію, калію і рэдказямельных элементаў лантану і цэрыю. У астатняй частцы мантыі пераважаюць іншыя элементы, такія як магній і жалеза.
Ніколь Мэер, дактарант Універсітэта Альбэрты ў Канадзе, кажа: «Калій і ніёбій складаюць большую частку мінералу. Гэтыя рэдкія элементы былі сабраныя разам і сканцэнтраваныя, каб сфармаваць незвычайнае рэчыва, нягледзячы на тое, што іншыя найбліжэйшыя элементы былі больш багатыя».