Вярхоўны суд Брытаніі: Барыс Джонсан незаконна прыпыніў працу парламента

У гісторыі Вялікабрытаніі прынята унікальная пастанова.

Вярхоўны суд Брытаніі прыняў унікальную, гістарычную пастанову, фактычна прызнаўшы прэм'ер-міністра Барыса Джонсана вінаватым у злоўжыванні ўладай. На думку судзейскай калегіі, ён неправамерна адправіў парламент на доўгі перапынак, паведамляе ВВС.

Вярхоўны суд - канстытуцыйны суд Брытаніі - у аўторак абвясціў пастанову наконт двух пазоваў аб прарагацыі, гэта значыць па станове прэм'ер-міністра адправіць парламент на перапынак да 14 кастрычніка. Судзейская калегія прызнала гэтую пастанову неправамернай.

Старшыня Вярхоўнага суда лэдзі Хейл абвясціла ў зале суда, што ўрад не выставіў ніякіх разумных абгрунтаванняў, чаму яму спатрэбілася перад самым запланаваным выхадам краіны з Еўразвязу абвяшчаць прарагацыю на пяць тыдняў, калі нармальная працягласць прарагацыі - некалькі дзён.

Таму ўсе 11 суддзяў калегіі аднагалосна пастанавілі, што прарагацыя была незаконнай, і абвясцілі яе юрыдычна нікчэмнай.

На 31 кастрычніка прызначаны выхад Брытаніі з Еўразвязу, і апаненты Джонсана абвінавачвалі яго ў тым, што ён, абвясціўшы перапынак, спрабуе не даць парламенту перашкодзіць ягонаму курсу на жорсткі разрыў з Еўразвязам.

Пасля такой пастановы апаненты Джонсана - як апазіцыйныя партыі, так і аднапартыйцы прэм'ера - немінуча і вельмі настойліва запатрабуюць ягонай адстаўкі.

Барыс Джонсан, які знаходзіцца цяпер у Нью-Ёрку на сесіі Генеральнай асамблеі ААН, адказваючы на пытанне журналістаў, ці пойдзе ён у адстаўку ў выпадку пройгрышу ў Вярхоўным судзе, адказаў толькі, што ён уважліва вывучыць пастанову суда, і што ўрад цалкам паважае закон і суд.

Прэм'ер-міністр адказваў, што прарагацыя - гэта звычайная працэдура падрыхтоўкі новай заканадаўчай праграмы ўрада, і ў гэтым выпадку яна абвешчаная выключна з той жа мэтай.