«Транснафта» абвінаваціла «Раснафту» ў пастаўках нафты з хлорам

Расейскія стандарты дапускаюць прысутнасць злучэнняў хлору, але не ў такой колькасці.

Расейскія дзяржкарпарацыі прадаўжаюць пошукі вінаватых у інцыдэнце з забруджваннем расейскай нафты хлорам, праз які больш за месяц прастойваў трубаправод «Дружба», а еўрапейскія пакупнікі вярнулі пастаўшчыкам больш за мільён тон бракаванай сыравіны, піша finanz.ru.

Хоць афіцыйныя абвінавачванні ў запампоўванні некандыцыйнай нафты выставілі невялікаму самарскаму ТАА «Нафтаперавалка», кіраўнікі якога, паводле версіі следства, выкралі чыстую нафту і запампавалі ў трубаправод тэхнічную сумесь, на справе расейская сыравіна ад найбуйнейшых здабытчыкаў рэгулярна перавышае еўрапейскія стандарты ва ўтрыманні хлорарганікі.

Расейскія стандарты дапускаюць прысутнасць злучэнняў хлору ў нафце ў аб'ёме, не большым за 6 частак на мільён (ppm). Аднак еўрапейскія НПЗ, якія набываюць сыравіну ў РФ, прывыклі да значна больш нізкіх значэнняў - 1-1,5 ppm.

Напрыклад, у «Раснафце» больш за палову аб'ёму, які здаецца ў сістэму, мае ўтрыманне хлорарганікі вышэй за 1 ppm, заявіла ў панядзелак «Транснафта».

Летась 100,4 мільёна тон нафты (50,3% ад здабычы) паступіла ў трубаправоды з доляй хлору ў дыяпазоне ад 1 да 3 ppm, а 2,5 млн тон - з паказчыкам, большым за 3. Сярэдняе ўтрыманне хлору ў нафце «Раснафты» склала 1,6 ppm летась і вырасла да 1,7 ppm сёлета.

«Пры гэтым у асобных рэгіёнах здабычы <...> ПАТ «НК «Раснафта» (Арэнбургская вобласць, Удмуртыя, Башкірыя і Цэнтральная Сібір) цяпер ажыццяўляе здачу нафты ў сістэму ПАТ «Транснафта» з утрыманнем ХАЗ да 4 ppm», - гаворыцца ў заяве кампаніі.

У канцы жніўня старшыня рады дырэктараў «Раснафты», былы канцлер ФРГ Герхард Шродэр звярнуўся ва ўрад РФ з прапановай узмацнення жорсткасці расейскіх нарматываў што да хлору і давядзення іх да еўрапейскіх (1 ppm), а таксама ўкараніць сістэму незалежнага кантролю якасці за пастаўкамі.

«Транснафта» ў сваю чаргу заявіла, што згодная дапусціць незалежных інспектараў, калі выдаткі возьмуць на сябе нафтавыя кампаніі. У каментары прапановы ўзмацніць жорсткасць нарматыву прэс-сакратар «Транснафты» Ігар Дзёмін заклікаў «Раснафту» пачаць з сябе і выканаць уласныя прапановы.