Сянцоў распавёў, як яму ўдалося вывезці дзённікі з турмы ў РФ
6- 24.09.2019, 16:34
- 11,131
Паводле слоў украінскага рэжысёра, дапамог яму дрэнны почырк.
Былы палітвязень РФ Алег Сянцоў распавёў, што амаль кожны дзень у турме пісаў літаратурныя замалёўкі і нататкі пра жыццё зняволеных, піша liga.net.
Са слоў рэжысёра, яму ўдалося прывезці запісы ва Украіну дзякуючы дрэннаму почырку і ляноце расейскіх праваахоўнікаў.
«Для іх галоўнае было вылавіць, не пішу я чаго экстрэмісцкага або чагосьці пра турму, што ім не спадабаецца. Яны не чытаюць усё - пятнаццаць сшыткаў ніхто не будзе чытаць. Яны проста праглядаюць выбарачна тэксты, спрабуючы зразумець, пра што я пішу. Цярпенне чытаць мой дрэнны почырк мала ў каго было. Таму я змог вывезці і турэмныя апавяданні, і дзённікі галадоўкі. Гэта іх недапрацоўка», - распавёў Сянцоў.
З ягоных слоў, найлепшы спосаб схаваць што-небудзь у турме - гэта пакласці на самае бачнае месца.
Сянцоў вярнуўся на радзіму 7 верасня 2019 года, праз больш чым пяць гадоў пасля затрымання ў захопленым Расеяй Крыме.