Зніжэнне хуткасці да 50 км/г: ДАІ рыхтуе «хітры» план?

Хуткасць могуць знізіць, але не на ўсіх вуліцах.

Размовы аб зніжэнні хуткаснага максімуму ў гарадах ходзяць даўно. Прыхільнікі ідэі «50 км/г» прыводзяць у прыклад краіны Еўропы, дзе ўжо даўно пралічылі часовыя страты кіроўцаў і плюсы ў пытанні бяспекі. Сцвярджаецца: усё, што вышэй, не пакідае шанцаў неабароненым удзельнікам руху. Нядаўна на адрас МУС паступіла петыцыя з прапановай знізіць гарадскі максімум. У міністэрстве адказалі, што такі варыянт прапрацоўваецца, паведамляе onliner.by.

«У большасці краін Еўрапейскага Звязу хуткасць у населеных пунктах абмежаваная 50 км/г, - пазначана ў звароце, пад якім падпісалася больш за 750 чалавек. - У Беларусі, згодна з пунктам 88 ПДР, у населеных пунктах дазваляецца рух транспартных сродкаў з хуткасцю, не большай за 60 км/г, а тым, што буксіруюць механічныя транспартныя сродкі - не больш за 50 км/г, у жылых і пешаходных зонах, на прылеглых тэрыторыях - не больш за 20 км/г. Хуткасць адыгрывае значную адмоўную ролю падчас ДТЗ, павялічваючы як імавернасць аварыі, так і цяжкасць наступстваў. Паводле звестак СААЗ, павелічэнне сярэдняй хуткасці аўтамабіля на 1 км/г цягне за сабой рост колькасці аўтакатастроф са смяротным фіналам на 4-5%. Акрамя таго, на нашу думку, хуткасць руху транспартнага сродку ўзмацняе забруджванне навакольнага асяроддзя і шум, а таксама неспрыяльна ўплывае на ўмовы жыцця ў гарадскіх раёнах».

«У рамках дзейнай канцэпцыі гарантавання бяспекі дарожнага руху «Добрая дарога» прадугледжаны шэраг дзейсных захадаў, многія з якіх абмяжоўваюць хуткасць перамяшчэння пешаходаў і карыстальнікаў лёгкага транспарту (ровараў, самакатаў, інвалідных вазкоў і т. д.), - дапаўняюць складальнікі петыцыі. - Напрыклад, будаўніцтва падземных пераходаў і парканаў усцяж дарог. У выніку ўзнікае несправядлівая сітуацыя, калі бяспека дарожнага руху гарантуецца галоўным чынам за кошт выгоды пешаходаў, аднак самы відавочны захад, які шматкроць апраўдаў сябе ў іншых краінах - абмежаванне хуткасці транспартных сродкаў - у нашай краіне ігнаруецца. Таму просім разгледзець пытанне аб унясенні змянення ў пункт 88 ПДР з мэтай абмежавання хуткаснага рэжыму ў населеных пунктах да 50 км/г».

У МУС адказалі: «У рамках падрыхтоўкі змяненняў у ПДР РБ прапрацоўваецца пытанне аб устанаўленні максімальнай хуткасці руху транспартных сродкаў у населеных пунктах, не большай за 50 км/г».

Дапоўнена

Тэму, якая абмяркоўваецца, пракаментаваў і начальнік УДАІ МУС Дзмітрый Карзюк.

«Звароты ідуць заўсёды, і ў большай ступені людзі просяць панізіць хуткасны рэжым, - цытуе кіраўніка Дзяржаўтаінспекцыі інфармагенцтва «Минск-Новости». - Цяпер мы аналізуем гэтыя звароты і будзем думаць, што можна зрабіць. Важна стварыць такія ўмовы, пры якіх будзе камфортна ехаць і бяспечна хадзіць. А бяспека пры 50 км/г значна вышэйшая, чым пры 60 км/г. Але гэта не значыць, што на ўсіх вуліцах горада мы павінны вызначыць адзнаку 50 км/г. Там, дзе гэта трэба, будзе 60 або 70 км/г, дзе магчыма, хуткасць будзе падвышаная да больш высокіх парогаў. Але агульная норма, на нашу думку, павінна быць 50 км/г».