«Еўрапейская Беларусь» праводзіць новыя пікеты для збору подпісаў у Менску
21- 9.09.2019, 8:38
- 21,473
Задачы кампаніі – змена ўлады на ўсіх узроўнях, адстаўка Лукашэнкі, закрыццё БелАЭС, годная праца для беларусаў.
8 верасня ў Беларусі пачалося вылучэнне «кандыдатаў» у «дэпутаты». Актывісты грамадзянскай кампаніі «Еўрапейская Беларусь» збіралі подпісы ля Камароўскага рынку, станцый метро «Плошча Перамогі», «Усход» і «Уручча». Прэтэндэнты кажуць, што галасы выбарнікаў Цэнтрвыбаркам лічыць не будзе, але час кампаніі можна выкарыстоўваць для таго, каб агучваць свае патрабаванні, паведамляе тэлеканал «Белсат».
– Нашы задачы – гэта змена ўлады на ўсіх узроўнях, адстаўка Лукашэнкі і ягоных чыноўнікаў, закрыццё Астравецкай атамнай электрастанцыі, забеспячэнне годнай працы за годны заробак для нашых суайчыннікаў на радзіме. Гэта, урэшце, правядзенне сумленных свабодных выбараў, – кажа каардынатар грамадзянскай кампаніі «Еўрапейская Беларусь» Яўген Афнагель.
– Нейкі палкоўнік ФСБ з Усходу наступае на нас і амаль знішчыў нашу краіну. І ў гэтай сітуацыі, я мяркую, нам проста трэба дзейнічаць, – заявіла журналістка Ірына Халіп, якая вылучыла сваю кандыдатуру ў 110 выбарчай акрузе Менска.
Сёння грамадзянская кампанія «Еўрапейская Беларусь» прадоўжыць правядзенне пікетаў для збору подпісаў у Менску. Актывісты будуць збіраць подпісы ў наступных месцах, паведамляе прэс-служба БНК:
каля станцыі метро «Плошча Якуба Коласа» з 12-й да 18-й,
каля станцый метро «Усход» і «Уручча» з 14-й да 19-й,
каля станцыі метро «Трактарны завод» з 15-й да 18-й,
каля станцыі метро «Міхалова» з 16-й да 19-й,
На Прывакзальнай плошчы з 16-й да 19-й.
Грамадзянская кампанія «Еўрапейская Беларусь» заклікала паставіць подпісы за яе кандыдатаў. Подпісы могуць ставіць толькі жыхары акругі, у якой вылучаюцца кандыдаты. Не забудзьцеся ваш пашпарт.