На Японію абрынуўся магутны тайфун «Факсай»
- 9.09.2019, 13:34
- 8,180
Ён стаў адным з наймацнейшых за дзесяцігоддзе.
На Токіё абрынуўся магутны тайфун «Факсай», у выніку без святла засталіся амаль 830 000 дамоў і суседняй з ім прэфектуры Ціба. Пра гэта паведамляе энэргетычная кампанія Tepco, піша liga.net.
Паводле інфармацыі мясцовых СМІ, больш за 10 чалавек былі траўмаваныя ў горадзе Татэяма ў прэфектуры Ціба і яшчэ 10 у горадзе Ціба. Раненні атрымалі два чалавекі ў прэфектуры Канага.
У некаторых раёнах вецер выбіў шыбы ў дамах, паваліў дрэвы.
У цэнтры сталіцы Японіі паваленыя дрэвы вакол Імператарскага палаца. Рух транспарту аднаўляюць, заняткі ў школах Токіё пакуль скасавалі.
У аэрапортах рэгіёну прыпынілі больш за 130 рэйсаў. Тайфун рухаўся на паўночны ўсход Японіі з хуткасцю 25 кіламетраў на гадзіну паблізу горада Нарыта, дзе размешчаны міжнародны аэрапорт.
Паводле звестак японскага метэаралагічнага агенцтва, атмасферны ціск у яго цэнтры складаў 960 гектапаскаляў, а хуткасць ветру дасягала 216 км на гадзіну.
