На волю выйшаў кіраўнік фінансавай піраміды, асуджаны летась на 6 гадоў

Як так атрымалася?

На волю выйшаў 26-гадовы Арцём Масейчук, якога ў траўні 2018 года прысудзілі да 6 гадоў пазбаўлення волі паводле абвінавачвання ў стварэнні фінансавай піраміды. Інфармацыю аб вызваленні пацвердзіў tut.by сам былы асуджаны.

Нагадаем, у траўні 2018 года суд першай інстанцыі прызнаў жыхара Менска вінаватым паводле абвінавачвання ў незаконнай прадпрымальніцкай дзейнасці і махлярстве (артыкулы 233 і 209 Крымінальнага кодэкса). Яго прысудзілі да 6 гадоў пазбаўлення волі з канфіскацыяй і штрафам 2500 базавых адзінак (61 250 рублёў). Але днямі ў сацсетках з'явілася інфармацыя, нібыта маладзён выйшаў на свабоду.

- Так, гэта праўда, - не стаў утойваць Арцём Масейчук. – Набылі моц змены ў Крымінальны кодэкс (артыкул 233 дэкрыміналізавалі), а яшчэ цяпер праходзіць амністыя, дзякуючы якой мне «знялі» 25 дзён. Людзям я не завінаваціўся, у мяне была запазычанасць толькі перад дзяржавай.

Іншыя падрабязнасці ён абмяркоўваць не захацеў: з ягоных слоў, тры гады разглядаў і знаходжання за кратамі (яго затрымалі яшчэ ў верасні 2016-га) аднялі шмат сіл.

Нагадаем, з ліпеня набылі моц змяненні ў Крымінальны кодэкс. Сярод іншага часткова дэкрыміналізавалі незаконнае прадпрымальніцтва паводле артыкула 233 КК. А таксама дыктатар падпісаў закон аб амністыі, дзякуючы якому прыкладна ў 2 тысяч чалавек з'явілася магчымасць вярнуцца дадому.

У свой час Арцём Масейчук быў адным з прыкметных актывістаў БРСМ. А ў 2015-2016 гадах з'яўляўся адным з удзельнікаў (паводле версіі сілавікоў - кіраўніком) беларускай галінкі кампаніі Kairos Technologies, якая займалася прыцягненнем грошай ад насельніцтва. Следчыя трактавалі гэта як фінансавую піраміду, а сумарны даход ацанілі на 326 тысяч рублёў.

Паводле версіі следства, фундатары Kairos Technologies аддавалі частку жорсткага дыска ў арэнду і аплачвалі ўступны ўнёсак, а потым атрымлівалі штомесяц даход нібыта за захоўванне зашыфраванай інфармацыі буйных карпаратыўных кліентаў. Абвінавачванне прыйшло да высновы, што выплаты ажыццяўляліся за кошт новых інвестараў кампаніі, а такі бізнэс не мог канкураваць з аналагічнымі прадуктамі рэальных буйных кампаній. Маладзён цалкам адмаўляў сваю віну, а яго адвакаты намагалі, што ў дзеяннях падабароннага няма складу злачынства.